ކަރެކްޝަންސްގެ 51 ވަނަ އަހަރީ ހަފްލާގައި ވާހަކަ ދައްކަވަމުން މިނިސްޓަރު އިމްރާން ވިދާޅުވީ، ޖަލުތަކުގެ ހާލަތު ބަދަލުކުރަން ސަރުކާރުން ކުރައްވާ އެންމެ މުހިއްމު ކަމަކީ ރިހިބިލިޓޭޓްކުރުންކަމަށެވެ.
މިސަރުކާރު ހަވާލުވިއިރު ރާއްޖޭގެ ޖަލުތަކުގެ ރިހިބިލިޓޭޝަން ނިޒާމް އޮތީ ބޮޑުތަނުން ފުރިހަމަކޮށް ރަނގަޅުކުރަން ޖެހިފައިކަންވެސް މިނިސްޓަރު ފާހަގަކުރެއްވިއެވެ. އެމަސައްކަތުގެ ތެރެއިން މުޅިން އަލަށް ކަރެކްޝަންގެ އެހެން ކޮމާންޑްތަކާ އެއްލެވެލްއެއްގައި ރިހިބިލިޓޭޝަން ކޮމާންޑެއް އުފައްދާ ކަރެކްޝަންގެ އޮނިގަނޑުގެ ތެރޭގައި ހިމަނާ ބޭނުންވާނެ މުވައްޒަފުން ގޮންޖެހުންތަކާއެކުވެސް ހޯދާފައިވާކަން މިނިސްޓަރު ފާހަގަކުރެއްވިއެވެ.
އަދި މިއަދު އަމާޒަކީ ކަރެކްޝަންގެ ބެލުމުގެ ދަށުގައި ޖަލުގައި ތިބޭ ހުރިހާ ގައިދީންނަކީވެސް ރިހިބިލިޓޭޓްވާންޖެހޭނެ މީހުންކަމުގައި ހެދުންކަން ފާހަގަކުރައްވާ އިމްރާން ވިދާޅުވީ ހުދު އެމަނިކުފާނުވެސް ހިމެނޭހެން ޖަލަށް ރައީސް ޔާމީންވެސް އެ ޕްރޮގްރާމު ފުރިހަމަ ކުރަންޖެހޭނެ ކަމަށް ކަމަށެވެ.
ރިހިބިލިޓޭޝަން މަސައްކަތުގެ އެންމެ ބޮޑު ގޮންޖެހުމަކީ އަދި ކުރަންޖެހޭ އެންމެ ބޮޑު މަސައްކަތަކީ ރިހިބިލިޓޭޝަންގެ މަސައްކަތަށް އަހުލުވެރިވެފައިތިބި އޮފިސަރުން އުފެއްދުންކަމަށާއި, އެކަމަށް ވަރަށްބޮޑު އިސްކަމެއްދެއްވާކަމަށް މިނިސްޓަރު ވިދާޅުވިއެވެ. އެކަމަށް ދައުލަތުން ވަރަށްބޮޑު ހޭދައެއްކޮށް, މަގުފަހިކޮށްދޭންޖެހޭކަމަށް ވެސް މިނިސްޓަރު ވިދާޅުވިއެވެ.
ހުދު މިނިސްޓަރު އިމްރާން ހިމެނޭހެން ރައީސް ޔާމީންވެސް ރިހިބިލިޓޭޓުވާންޖެހޭނެކަމަށް މިނިސްޓަރު ވިދާޅުވިއިރު، ރައީސް ޔާމީންގެ ވެރިކަމުގައި މޭޑޭގެ މުޒާހަރާ އާއި ގުޅިގެން ހައްޔަރުކޮށް ޖަލަށް ލެވުނު މީހުންގެ ތެރެއިން މިނިސްޓަރު އިމްރާން ހިމެނެއެވެ.
އަދި މި ސަރުކާރުގެ ވެރިކަމުގައި ރައީސް ޔާމީންގެ މައްޗަށް ފަސް އަހަރުގެ ޖަލު ހުކުމެއް އިއްވި އެވެ. އެ ޖަލު ހުކުމުން ރައީސް ޔާމީން މިހާރު ހުންނެވީ މިނިވަންވެ ވަޑައިގެން ގޭގައެވެ. އަދިވެސް އިތުރު ޝަރީއަތްތައް ރައީސް ޔާމީންގެ މައްޗަށް ދަނީ ހިންގަމުން ނެވެ.
