ޕްލޭނިން މިނިސްޓްރީން 2019 ވަނަ އަހަރު އެކުންފުންޏާއި ހަވާލު ކުރި މި މަސައްކަތަކީ، 15،398،304.77 ރުފިޔާގެ މަޝްރޫއެކެވެ. މި މަސައްކަތުގެ އަމަލީ މަސައްކަތް ފެށިފައިވަނީ، 2019 ވަނަ އަހަރުގެ އޮކްޓޯބަރު މަހުގެ ތެރޭގަ އެވެ.
މިކަމަށްޓަކައި މިއަދު ނައިވާދޫގައި ބޭއްވުނު ހާއްސަ ރަސްމިއްޔާތެއްގައި ފެނުގެ ނިޒާމުގެ ހިދުމަތް ރަސްމީކޮށް އިފްތިތާހު ކޮށްދެއްވީ، ރައީސް އިބްރާހިމް މުހައްމަދު ސޯލިހު އެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، މިއަދު ފެށިގެން މިދިޔަ ފެނުގެ ނިޒާމަކީ، ނައިވާދޫއަށް އެތައް ޒަމާނެއް ވަންދެން ބޭނުން ޖެހިފައި ހުރި ކަމެއް ކަމަށެވެ. އަދި މިއީ އެއްވެސް ރައްޔިތަކަށް އަދި އެއްވެސް ރަށަކަށް ތަފާތު ކުރުމެއްނެތި ސަރުކާރުން ކޮށްދެއްވަމުން އަންނަ ކަންކަން ކަމަށް ވިދާޅުވި އެވެ.
މީގެ އިތުރުން ރައީސް ވިދާޅުވީ، މިއަދު ފެށިގެން މިދިޔަ ފެނުގެ ނިޒާމުގެ ދަށުން ދެން ރަށުގެ ރައްޔިތުންނަށް ފެނުގެ ދަތިކަން ދިމާ ނުވާނެ ކަމަށެވެ. އަދި މި މަސައްކަތް ފެށީ ކޮވިޑް-19 ގެ ދުވަސް ވަރު ކަމުން މަސައްކަތް ކުރުމަށް ދަތިތަކެއް ކުރިމަތިވި ކަމަށާއި، އެހެން ނަމަވެސް އެކަންކަމާއި އެކުވެސް ސަރުކާރުން ވީ ވައުދުތައް ފުއްދަމުން އަންނަ ކަމަށް އެމަނިކުފާނު ވިދާޅުވި އެވެ.
ރައީސްގެ ވާހަކަފުޅުގައި އިތުރަށް ވިދާޅުވީ، ނައިވާދޫއަށް އަދިވެސް ގިނަ ކަންކަން ބޭނުންވާ ކަމަށާއި، އެކަންކަން ކޮށްދެއްވަމުން ގެންދަވާނެ ކަމަށެވެ. އަދި ކައުންސިލްގެ އެއްބާރުލުމާއި އެކު ސަރުކާރުން ރަށުގެ ރައްޔިތުން ބޭނުންވާ ކަންކަން ކޮށްދެއްވަމުން ގެންދަވާނެ ކަމަށް އެމަނިކުފާނު ވިދާޅުވި އެވެ.
ނައިވާދޫގައި ތަރައްގީ ކުރި ފެނުގެ ނިޒާމުގެ މަސައްކަތް ބެލެހެއްޓުން ހަވާލު ކޮށްފައިވަނީ، ފެނަކަ ކޯޕަރޭޝަން އިންނެވެ.
މި މަސައްކަތުގެ ދަށުން، 4.5 ކިލޯ މީޓަރުގެ ފެނުގެ ނިޒާމުގެ ވިއުގައެއް ވަނީ އެޅިފަ އެވެ.
މީގެ އިތުރުން، ދުވާލަކު 40 ޓަނުގެ ފެން އުފައްދާ ދެ އާރް.އޯ ޕްލާންޓް ބެހެއްޓިފައި ވާއިރު، ފެން ރައްކާކުރުމަށް، 185 ޓަނުގެ ދެ ތާންގި އަދި ވާރޭފެން ރައްކާކުރުމަށް 150 ޓަނުގެ ތާންގިއެއް ވަނީ ބެހެއްޓިފަ އެވެ. މީގެ އިތުރުން މިހާތަނަށް 174 ގެއަކަށް ވަނީ، ފެނުގެ ކަނެކްޝަން ގުޅައިދީފަ އެވެ.
