ތިލަދުންމަތީގެ ހަތަރު ރަށަކަށް މިހާރު ރައީސް ސޯލިހް ކުރައްވަމުން ގެންދަވާ ދަތުރުފުޅުގައި ހދ. ނައިވާދޫ ފެނުގެ ނިޒާމް އިފްތިތާހްކޮށްދެއްވައި ދެއްކެވި ވާހަކަފުޅުގައި އެމަނިކުފާނު ވިދާޅުވީ، އެމަނިކުފާނުގެ ސަރުކާރުން ވީ އެންމެ ބޮޑު ވައުދަކީ އެއްވެސް ރައްޔިތަކު ތަފާތު ނުކޮށް، ހަމަހަމަކަންމަތީ ހިދުމަތްތައް ފޯރުކޮށްދިނުން ކަމަށެވެ.
ރައީސް ސޯލިހު ވިދާޅުވީ، ގާނޫނު އަސާސީގައި ބުނަނީ ރައްޔިތުންގެ މެދުގައި ތަފާތުނުކުރުމަށް ކަމަށާއި، ތަފާތު ނުކުރުމަކީ ހަމައެކަނި ކޯޓަށް ހުށަހެޅޭ މައްސަލައެއްގައި ފަނޑިޔާރުކުރު ނުވަތަ ފުލުސް އޮފީހަށް ހުށަހެޅޭ މައްސަލައެއް ބެލުމުގައި ފުލުހުން ކުރަންޖެހޭ ކަމެއް ނޫން ކަމަށެވެ. އެއީ ރައްޔިތުން އިންތިހާބުކުރާ ސަރުކާރަކުން ކުރަންޖެހޭ ކަމެއްކަމަށް ރައީސް ސޯލިހް ވިދާޅުވި އެވެ.
ހަނިމާދޫގައި މިއަދު އިފްތިތާހުކުރެވުނު ފެނާއި، ނަރުދަމާގެ ނިޒާމަށް އިޝާރާތްކުރައްވާ ރައީސް ސޯލިހް ވިދާޅުވީ، ހަނިމާދޫގައި ބައެއް ދުވަސްވަރު ފެނަށް ޖެހި އެއްގޮތަކަށްވެސް ފެންކޮޅެއް ނުލިބޭ ހިސާބަށް ގޮސްފައި އެބަހުރި ކަމަށެވެ. ނަމަވެސް މިއަދު ގާއިމުކުރެވުނު ނިޒާމުން އެކަމަށް ނިމުމެއް ގެނެވޭނެކަން ރައީސް ފާހަގަކުރެއްވި އެވެ.
ނައިވާދޫ ފެނުގެ ނިޒާމް ގާއިމްކުރުމުގެ މަސައްކަތް ނިމި، ފެނަކައިން އެ ރަށުގައި ހިދުމަތްދޭން ފަށާފައި ވަނީ، ހުސްވި އޮގަސްޓް މަހުގެ ހަތް ވަނަ ދުވަހުން ފެށިގެންނެވެ. މިގޮތުން ނައިވާދޫގެ 4.5 ކިލޯމީޓަރުގެ ފެނުގެ ނެޓްވޯކެއް އަޅައި 174 ގޭބިސީއަކަށް މިހާރު ވަނީ ފެން ގުޅައިދީފައެވެ.
