މިއަދު ފާހަގަކުރާ ގައުމީ ދުވަހުގެ ރަސްމީ ޖަލްސާ ބާއްވާފައިވަނީ ގައުމީ ބަތަލު ބޮޑުތަކުރުފާނުގެ އުފަން ރަށް އުތީމުގަ އެވެ.
މި ޖަލްސާގައި ރައީސް އިބްރާހިމް މުހައްމަދު ސޯލިހުގެ ދެކަނބަލުންނާއިކު، ހޯމް މިނިސްޓަރު އިމްރާން އަބްދުﷲ އާއި، ޑިފެންސް މިނިސްޓަރު މާރިޔާ އަހްމަދު ދީދީ ވެސް ބައިވެރިވެވަޑައި ގެންނެވި އެވެ.
އުތީމުގައި އޮތް ގައުމީ ޖަލްސާގައި ވާހަކަފުޅު ދައްކަވަމުން ރައީސް ސޯލިހް އާއި މިނިސްޓަރު އިމްރާންވެސް ވަނީ ބޮޑުތަކުރުފާނުގެ ހިތްވަރާއި، ކެރުންތެރިކަމާއި ގައުމީ ޖިހާދުގެ ވާހަކައިން ތައުރީފުކުރައްވާފައެވެ.
ޖަލްސާ ނިންމާލެއްވުމުގެ ގޮތުން ވާހަކަދައްކަވަން ސްޓޭޖު މައްޗަށް އެރުއްވީ އުތީމު ކައުންސިލުގެ ރައީސް އަބްދުﷲ ރަޝީދެވެ.
އޭނާގެ ވާހަކައިގައި ވަރަށް މުހިންމު ކަމެއް ފާހަގަކުރެއްވި އެވެ. އެއީ ބޮޑުތަކުރުފާނުގެ ގައުމީ ހިތްވަރު އާކުރުމަށް ކޮންމެ އަހަރަކު ގައުމީ ދުވަހެެއް ކުލަގަދަކޮށް ފާހަގަކުރެވުނަސް، އަދި ކުރެއްވި ހިދުމަތުގެ ވާހަކައަށް ބަސްތަކުން ތައުރީފު އޮހުނަސް، އެ ހިދުމަތް ހަގީގީ މާނާގައި އަގުވަޒަން ކުރުމަށް، އެމަނިކުފާނުގެ ތަރަކި ހިމާޔަތް ކުރެވިފައި ނެތް ވާހަކައެވެ.
އެގޮތުން ބޮޑުތަކުރުފާނުގެ ޒުވާން ދުވަސްވަރު އެންމެ ޝައުގުވެރިވެ ކޮށްއުޅުނު ދޫނި ހިތްޕެވުމަށް އިޝާރާތްކުރައްވާ ކައުންސިލުގެ ރައީސް ވިދާޅުވީ، އެތަން އޮތީ ގިރާ ނެތިގޮސްފައި ކަމަށެވެ.
ރައީސް ސޯލިހަކީ ރާއްޖޭގެ ތަރީހާއި ތަރިކަ ހިމާޔަތްކުރައްވަން ވަރަށް އިސްކަންދެއްވާ ބޭފުޅެއް ކަމަށްވާއިރު، ބޮޑުތަކުރުފާނުގެ މުހިންމު އެ ތަރިކަ ވެސް ހިމާޔަތްކޮށްދެެއްވުމަށް އޭނާ އެދިވަޑައިގަތެވެ.
ރަށުގެ ހުޅަނގު ފަރާތުގައި އޮތް ތުނޑިއަކީ އާދަކޮށް ބޮޑުތަކުރުފާނުގެ ޅަދުވަސްވަރު ދޫނި ހިތްޕެވުމުގައި ގިނަ ވަގުުތުތަކެއް ހޭދަކުރެއްވި ތަނެއްކަމަށް ތާރީހީ ފަތްފުއްތަކުގައި ވެއެވެ.
ބޮޑުތަކުރުފާނު ދޫނި ހިތްޕަވަން އުޅުއްވި ކަމަށް ބުނާ ތުނޑި——ފޮޓޯ: ވަގުތު
އެތަން ގިރަން ފެށީ ރަށުގެ ބަނދަރު ހެދި ފަހުން ނެވެ. އެކަން މީގެ ކުރިންވެސް ސަރުކާރުގެ ސަމާލުކަމަށް އެރަށު ކައުންސިލުން ގެނެސްފައި ވެއެވެ. ނަމަވެސް އެކަމަށް އިޖާބަ ނުލިބޭ ކަމަށް ކައުންސިލުން މީގެ ކުރިންވެސް ބުނެފައި ވެއެވެ.
ގިރަމުންދާ އެ ދުނޑިން މީގެ ކުރިން އާސާރީ ބައެއް ތަކެތި ވެސް ފެނިފައި ވެއެވެ. އެގޮތުން، ރުނބައާއި، ޖާޑިއާއި، ސީނުތަށި ފަދަ ތަކެތިކެތީގެ އިތުރުން އިހުގައި ބޭނުންކުރި ފެންވަޅެއްވެސް ވަރަށް ފަހުން އެތަނުން ވަނީ ފެނިފައެވެ.
މުޙައްމަދު ތަކުރުފާނު ދޫނި ހިއްޕަވަން ދުރުވި ތުނޑީ ސަރަޙައްދުން ފެނިފައިވާ ވަޅެއް——ފޮޓޯ: އުތީމް
އުތީމުން ފާޅުކުރާ ކަންބޮޑުވުމަކީ އެތަކެއްޗާއިއެކު އެ ތާރީހީ ތުނޑި ފެންނުގެ ތެރެއަށް ގެއްލި ތަރީހީ މުހިންމު ތަރިކަތަކެއް ފުހިވިގެންދާނެ ކަމުގެ ކަންބޮޑުވުމެެވެ.
