ކާނަލް ނަޝީދުގެ މައްޗަށް ދައުލަތުން ކުރާ އެއް ޖިއްސުން ގުޅުން ހިންގުމުގެ ޝަރީއަތުގެ އަޑު އެހުމެއް މިއަދު ކްރިމިނަލް ކޯޓުގައި ކުރިއަށްދިޔަކަމަށްވަނީ މައުލޫމާތު ލިބިފައެވެ. އެހެންނަމަވެސް މި އަޑު އެހުން ކުރިއަށް ގެންގޮސްފައިވަނީ އާއްމުކޮށް ހުޅުވާނުލައެވެ. އެހެންކަމުން އަޑު އެހުމުގެ ތަފްސީލެއް ނުލިބެއެވެ.
މައުލޫމާތު ލިބިފައިވާ ގޮތުގައި ވީޑިއޯގެ ތާޑްޕާޓީ އެނަލަސިސް ހެދުމަށް ކާނަލްގެ ފަރާތުން ހުށަހަޅާ ބައެއްގެ ތަފްސީލް ކޯޓަށް ދިނުމަށް ކޯޓުންވަނީ އެދިފައެވެ.
ކާނަލް ނަޝީދުގެ މައްޗަށް ދައުލަތުން ކުރަނީ، ބަންގްލަދޭޝް ފިރިހެނަކާ އެކު އެއް ޖިއްސުން ގުޅުން ހިންގިކަމުގެ ތުހުމަތެވެ. މީގެ ބައެއް މައްސަލަތައް މިހާރުވަނީ ހުކުމްވެސް ކޮށްފައެވެ. އަދި ބައެއް މީހުން ފިލައިގެންވެސް އެބައުޅެއެވެ.
މި ފަހުން އާއްމުވި އެއް ޖިއްސުން ގުޅުން ހިންގި މީހުންގެ ތެރޭގައި ކާނަލް ނަޝީދު ހިމެނޭ ވީޑިއޯ ސޯޝަލް މީޑިއާގައި ލީކުވެފައިވާއިރު އޭނާވަނީ އެކަން ކުރިކަމަށް އެންމެ ފުރަތަމަވެސް އިންކާރުކޮށްފައެވެ. މީގެ ކުރިން މި މައްސަލަތަކުގެ ތެރޭގައި ހިމެނި މިހާރު ހުކުމްކޮށްފައި ތިބި ބައެއް މީހުންވަނީ އެ މީހުން ކުރި ކުށަށް އިއުތިރާފުވެ ތައުބާވެސްވެފައެވެ.
