ރައީސް ޔާމީން މިހެން ވިދާޅުވީ، ރާއްޖޭގެ އެންމެ އުތުރުގެ 5 ރަށަކަށް މިހާރު ކުރައްވަމުން ގެންދަވާ ދަތުރުފުޅުގެ އެންމެ ފުރަތަމަ މަންޒިލްކަމުގައިވާ ހއ. އިހަވަންދޫގައި ވާހަކަ ދައްކަވަމުންނެވެ.
ރައީސް ޔާމީން ވިދާޅުވީ އެމަނިކުފާނުގެ ސަރުކާރެއްގައި ފުރަތަމަ 10 ދުވަހުގެ ތެރޭގައި 'ވާނުވާ' ޖަހާފައިވާ އެންމެން މިނިވަން ކުރައްވާނެ ކަމަށެވެ. ވާނުވާ ޖެހުމަކީ ޝަރީއަތް ނިމެންދެން ބަންދުކުރާ ކުރުމަށް ކިޔައި އުޅޭ ނަމެކެވެ.
ޔާމީން ވިދާޅުވީ ޕީޕީއެމަަށް 2023 ވަނަ އަހަރުގެ ރިޔާސީ އިންތިޚާބު ކާމިޔާބުވެއްޖެނަމަ ވެރިކަމުގެ ފުރަތަމަ 10 ދުވަހުގެ ތެރޭގައި، ޝަރީޢަތް ނިމެންދެން ބަންދުކޮށްފައި ތިބި މީހުން ބަންދުން ދޫކުރައްވާނެކަމަށެވެ.
ޔާމީންގެ އުތުރު ދަތުރުފުޅުގައި އެންމެ ފުރަތަމަ ވަޑައިގެންނެވީ ހއ. އިހަވަންދޫއަށެވެ. މި ދަތުރުފުޅުގައި ހއ. ގެ އިތުރު 4 ރަށަކަށް އެ މަނިކުފާނު ވަޑައިގަންނަވާނެއެވެ.
ރާއްޖޭގެ އެންމެ އުތުރުގައި ރައީސް ޔާމީން ރިޔާސީ އިންތިހާބަށް ކެމްޕެއިން ކުރައްވާއިރު އެ މަނިކުފާނުވަނީ މީގެ ކުރިން ދ. އަތޮޅު ކުޑަހުވަދޫއަށްވެސް ވަޑައިގެން ކެމްޕެއިން ކުރައްވާފައެވެ.
