ހއ. ގެ ރަށްތަކަށް އެމަނިކުފާނު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ރޭ، އެ އަތޮޅު ދިއްދޫގައި ބޭއްވި ޖަލްސަލާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ވެރިކަމުގެ އިތުރު ދައުރެއް އަދާކުރުމަށް ލިބިވަޑައިގެންފިނަމަ، ދިއްދޫގެ ފަޅު ހިއްކާ، އެރަށުގައި އެއާޕޯޓެއް އަޅުއްވައި ދެއްވާނެ ކަމަށެވެ.
އަދި ކުރިއަށް އޮތް 2023 ވަނަ އަހަރުގެ ރިޔާސީ އިންތިހާބު ޕީޕީއެމް އަށް ކާމިޔާބު ކުރެވިއްޖެނަމަ ދިއްދޫ ރައްޔިތުން ބޭނުންވާ ކަންކަން ކޮށްދެއްވާނެ ކަމުގެ ޔަގީންކަން ދެއްވާ ކަމަށްވެސް އެމަނިކުފާނު ވިދާޅުވި އެވެ.
މީގެ އިތުރުން އެމަނިކުފާނު ވިދާޅުވީ، ދިއްދޫ ރައްޔިތުން އެމްޑީޕީއަށް މަޖިލީހުގެ ގޮނޑި ދިނީ ފޮނި އުއްމީދުތަކަކާއި އެކު ކަމަށާއި، އެހެން ނަމަވެސް ރައްޔިތުން ބޭނުންވާ ކަންކަން ކޮށްދެވިފައި ނުވާ ކަމަށެވެ. އަދި ރަށަށް ކޮށްދޭންޖެހޭ އެއްވެސް ކަމެއް ރައީސް އިބްރާޙިމް މުހައްމަދު ސޯލިހުގެ ސަރުކާރުން ކޮށްދީފައި ނުވާ ކަމަށްވެސް އެމަނިކުފާނުގެ ވާހަކަފުޅުގައި ވަނީ ފާހަގަ ކުރައްވާފަ އެވެ.
ހއ. އަތޮޅުގެ ވެރިކަން ކުރާ ރަށް ކަމަށްވާ ދިއްދޫ އަކީ، ބޮޑު ފަޅެއް އޮންނަ ރަށަކަށް ވާއިރު، އެރަށުގެ ރައްޔިތުން އެރަށުގައި އެއާޕޯޓެއް އަޅައިދިނުމަށް އެދި މީގެ ކުރިންވެސް ވަނީ ސަރުކާރުތަކުގައި އަޑުއުފުލާފަ އެވެ. އެހެން ނަމަވެސް އެއްވެސް ސަރުކާރަކުން އެރަށުގައި އެއާޕޯޓް އެއް އެޅުމަށް މީގެ ކުރިން ވިސްނާފައި ނުވެ އެވެ.
