ޔޯގާ ހަމަނުޖެހުންތަކާ ގުޅިގެން ވަކީލަކު ހޯދަން ސޯޝަލް މީޑިއާއަށް ނުކުތީ، ތ. ތިމަރަފުށީ ނަރުގިސްވިލާ ޢަބްދުﷲ ރިފާއުއެވެ. ސޯޝަލް މީޑިއާގައި އޭނާ ބުނެފައިވަނީ އޭނާވަނީ މާލީ ތަނަވަސްކަން ނެތުމުން ވަކީލަކު އައްޔަން ކުރަން ނުކުޅެދިފައި ކަމަށެވެ.
އޭނާގެ މައްޗަށް ދައުލަތުން ޔޯގާ ކަންތަކާ ގުޅިގެން ހަތަރު ދައުވާއެއް އުފުލާފައިވެއެވެ. އެ ހަތަރު ދައުވާއަކީ ޓެރަރިޒަމްގެ އަމަލެއް ކުރުމުގެ ދައުވާ އާއި ޓެރަރިސްޓް ޖަމާއަތަކަށް ތާއީދު ކުރާ މީހެއްކަން ދޭހަވާ ފަދަ ލިޔުމެއް ގެންގުޅުމުގެ ދައުވާ އާއި ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގަން އުޅުމުގެ ދައުވާ އަދި ގާނޫނު ތަންފީޒު ކުރާ މުވައްޒަފެއްގެ މަސައްކަތަށް ގަސްތުގައި ހުރަސް އެޅުމުގެ ދައުވާއެވެ.
މި ދައުވާތައް ސާބިތު ވެއްޖެނަމަ ޢަބްދުﷲ ރިފާއުގެ މައްޗަށް ތިރީހަކަށް އަހަރުގެ ހުކުމެއް އައުމަކީ އެކަށީގެންވާ ކަމެކެވެ. ދައުލަތުން ދައުވާ އުފުލާފައި މިވާ މައްސަލަތަކުގައި، ވަކީލަކު ހޯދަން އޭނާއަށްވަނީ 10 ދުވަހުގެ ފުރުސަތެއް ދީފައެވެ. އަބްދުﷲ ރިފާއު ވަނީ މި މައްސަލަތަކުގައި އޭނާއަށް ވަކާލާތު ކޮށްދޭނެ މީހަކު ހޯދަން، ސޯޝަލް މީޑިއާގައި އާއްމުންގެ އެހީތެރިކަމަށް އެދިފައެވެ.
ޔޯގާ ކަންތަކުގައި ދައުލަތުން ވިއްސަކަމަށް މީހުންގެ މައްޗަށް ދައުވާ ކުރެއެވެ.
