މުފްތީ މެންކް ގެ މިދަތުރުފުޅުގައި މިރޭ އައްޑޫ ސިޓީގައި ދަރުސް ދެއްވުމަށް ހަމަޖެހިފައިވަނީ މިރޭ އައްޑޫ ހައި ސްކޫލުގައި ރޭގަނޑު 8:45 ގައެވެ. މި ދަރުސް ހާއްސަކުރާނީ، އުފެއްދުންތެރި މުސްލިމް ގެ މައްޗަށެވެ. މުފްތީ މެންކް އައްޑޫ ސިޓީއަށް މި ވަޑައިގެންނެވީ ރޭ ފުވައްމުލަކުގައި ދަރުހެއް ދެއްވުމަށް ފަހުއެވެ.
މުފްތީ މެންކް ރާއްޖެއަށް މިހާރު ކުރައްވަމުން ގެންދަވާ ދަތުރުގައި އެންމެ ފުރަތަމަ ދަރުސް ދެއްވީ މާލޭ ސިޓީގައި މިދިޔަ ހުކުރު ދުވަހުގެ ރޭއެވެ. އެ ދުވަހު އިސްލާމީ މަރުކަޒުގައި އިމާމްވެ ހުކުރު ކުރެއްވީވެސް މުފްތީ މެންކެވެ.
މި ދަތުރުގެ ފަހު ދަރުސް އޮންނާނީ 31 ވަނަ ދުވަހުގެ ރޭ ހުޅުމާލޭ ސިންތެޓިކް ޓްރެކްގައެވެ. އެރޭ 20:45 ގައި އޮންނަ ދަރުސްގެ މައުލޫއު އަކީ އާއިލީ މައްސަލަތަކެވެ.
މިއީ މުފްތީ މެންކް ރާއްޖެއަށް ކުރައްވާ ހަތަރު ވަނަ ދަތުރުފުޅެވެ. މީގެ ކުރިން މެންކު ވަނީ 2015, 2016 އަދި 2020 ވަނަ އަހަރުތަކުގައި މާލެ ސަރަހައްދާއި ކުޅުދުއްފުށި ސިޓީ އަދި އައްޑޫ ސިޓީ ގައި ދީނީ ދަރުސް ދެއްވާފައެވެ.
