އެސްއޯއީ ކޮމިޓީން މިގޮތަށް ނިންމާފައިވަނީ، ތޮއްޑޫ ދާއިރާގެ މެމްބަރު ހަސަން ޝިޔާން ހުށަހެޅުއްވި ގަރާރު ދިރާސާ ކުރުމަށްފަހު އެވެ. 

އެގަރާރުގައި ވާގޮތުން، ސްޓެލްކޯ އަދި ފެނަކައިން ކަރަންޓުގެ ހިދުމަތް ފޯރުކޮށްދެމުން ގެންދާ މާލެއާއި، ރަށްރަށާއި ދެމެދު ވިޔަފާރިތަކަށް ބިލުކުރަމުން ގެންދާ ރޭޓާއި، ބޭންޑުކުރުމުގައި ތަފާތުކުރުންތައް ގެންގުޅޭތީ އެކަމުން ރަށްފުށުގެ ކުދި ވިޔަފާރީތައް ހިންގާ ފަރާތްތަކުގެ ވިޔަފާރީއަށާއި އެ ފަރާތްތަކަށް ބޮޑެތި ގެއްލުންތައް ވަމުންދާކަމުގެ ކަންބޮޑުވުންތައް އެފަރާތްތަކުން ފާާޅުކުރަމުން ދެއެވެ.

އެގޮތުން ސްޓެލްކޯއިން ކަރަންޓުގެ ހިދުމަތް ފޯރުކޮށްދެމުން ގެންދާ، އއ. އަތޮޅާއި، އދ. އަތޮޅާއި، ވ. އަތޮޅުގެ އިތުރުން ކ. އަތޮޅުގެ ރަށްރަށާއި، ފެނަކައިން ކަރަންޓުގެ ހިދުމަތްދޭ ރަށްރަށުގެ ވިޔަފާރީ ހިންގާ ތަންތަަނަށް ބިލު ކުރާވަރު، މާލޭ ސަރަހައްދުގައި ހަމަ އެ ވިޔަފާރީތައް ހިންގާ ތަންތަނަށް ބިލު ކުރާވަރަށްވުރެ ބޮޑުކަމަށް ގަރާރުގައި ވެއެވެ. 

މާލެ އާއި ރަށްފުށާއި ދެމެދު ބޭންޑުކޮށް ރޭޓުކުރަމުންދާ ވަރު

މާލެއަށް ބިލް ކުރާ ރޭޓު

• 0 އިން 100 ޔުނިޓާއި ދެމެދަށް 3 ރުފިޔާ 30 ލާރި
• 101 އިން 300 ދެމެދު ޔުނިޓަށް 3 ރުފިޔާ 35 ލާރި
• 301 އިން 500 ޔުނިޓާއި ދެމެދަށް 3 ރުފިޔާ 65 ލާރި
• 501 އިން 600 ޔުނިޓާއި ދެމެދަށް ހަތަރު ރުފިޔާ
• 601 އިން 3000 ޔުނިޓާއި ދެމެދަށް ހަތަރު ރުފިޔާ 35 ލާރި
• 3001 ޔުނިޓުން 10000 ޔުނިޓާއި ދެމެދަށް ފަސް ރުފިޔާ 75 ލާރި
• 10000 ޔުނިޓުން މަތިން ހަ ރުފިޔާ 65 ލާރި

ރަށްފުށުގެ ވިޔަފާރިތަަކަށް ބިލް ކުރާ ރޭޓު

• 0 އިން 100 ޔުނިޓާއި ދެމެދަށް 3 ރުފިޔާ 25 ލާރި
• 101 އިން 200 ދެމެދު ޔުނިޓަށް 3 ރުފިޔާ 75 ލާރި
• 201 އިން 300 ޔުނިޓާއި ދެމެދަށް 4 ރުފިޔާ 75 ލާރި
• 300 ޔުނިޓުން މަތިން ހަ ރުފިޔާ

އެ ތަފާތުކުރުންތައް ނައްތާލައި، ހަމަހަމަ ކުރުމަށް ގޮވާލައި ހުށަހެޅި މި ގަރާރު ދިރާސާކޮށް އެސްއޯއީ ކޮމިޓީން ނިންމާފައިވަނީ، މާލެ އާއި ރަށްފުށުގެ ވިޔަފާރި ހިންގާ ތަންތަނުގެ ކަރަންޓު ބިލު ރޭޓާއި ފެނާއި ނަރުދަމާގެ ރޭޓުތައް އެއް ހަމަކުރުމުގެ މަސައްކަތް 2023 ވަނަ އަހަރުގެ ޖޫން މަހުގެ ނިޔަލަށް ނިންމުމަށް އެންގުމަށެވެ.

މިގޮތަށް ނިންމުމުގެ ކުރިން އެސްއޯއީ ކޮމިޓީން ފައިނޭންސް މިނިސްޓްރީ އާއި މަޝްވަރާކޮށްފައިވެއެވެ. މިނިސްޓްރީން ފާހަގަކޮށްފައިވާގޮތުގައި ކުރިއަށްއޮތް ތަނުގައި ކަރަންޓު ބޭނުންކުރަމުންދާ މިންވަރު އަހަރުން އަަހަރަށް އިތުރުވާނެކަމަށް ލަފާކުރެވެ އެވެ. އަދި އަންނައަހަރު ކަރަންޓަށް ކުރާ ހަރަދު ބޮޑުތަނުން އިތުރުވާނެ ކަމަށް ފިނޭންސުން ބުންޏެވެ.