ކެންސަރަށް ފަރުވާ ހޯދަމުން އަންނަ ޕެލޭ އެޑްމިޓްކޮށްފިކަން ހާމަކުރީ އޭނާގެ އަންހެން ދަރި ސޯޝަލް މީޑިއާގައެވެ. އެހެންނަމަވެސް އެއްވެސް އިމަޖެންސީއެއް އަދި ސަޕްރައިޒެއްވެސް ނެތް ކަމަށް ޕެލޭގެ ދަރި ސޯޝަލް މީޑިއާގައި ބުންޏެވެ.
ރިޕޯޓްތައް ބުނާ ގޮތުން ސައޯޕޯލޯގެ ހޮސްޕިޓަލެއްގައި ޕެލޭ އެޑްމިޓްކޮށް ބައެއް ޓެސްޓްތައް އަންނަނީ ހަދަމުންނެވެ. އުމުރުން 82 އަހަރުގެ ޕެލޭއާ ގުޅޭ ގޮތުން އީއެސްޕީއެން ބްރެޒިލުން ރިޕޯޓްކޮށްފައިވަނީ ޕެލޭ މިވަގުތު ފަރުވާ ހޯދަމުން ދަނީ ހިތުގެ މައްސަލަތަކަކަށެވެ. އަދި ކެންސަރުގެ ފަރުވާގައި ދެވޭ ކީމޯ ތެރަޕީން އުއްމީދު ކުރި ކަހަލަ ކުރިއެރުންތަކެއް ނުލިބޭ ކަމަށްވެސް އީއެސްޕީއެން ބްރެޒިލުން ރިޕޯޓް ކުރިއެވެ.
ޕެލޭގެ ހާލަތާ ގުޅޭ ގޮތުން ޕެލޭ އެޑްމިޓްކޮށް ފަރުވާ ހޯދަމުން އަންނަ ހޮސްޕިޓަލުން އަދި ރަސްމީކޮށް އެއްވެސް އެއްޗެއް ނުބުނެއެވެ. ބްރެޒިލްގެ ލެޖެންޑް ޕެލޭ އެޑްމިޓްކޮސް ފަރުވާ ދެވެމުން އަންނަ ހަބަރު މި އާއްމުވީ ވޯލްޑްކަޕުގެ ގްރޫޕް ސްޓޭޖުގެ ފަހު މެޗުތަކުގެ ތެރެއިންނެވެ. ޕެލޭ ނިސްބަތްވަ ބްރެޒިލްވަނީ މުބާރާތުގެ ގަދަ ސޯޅައިގެ ތެރޭގައި ހިމެނިފައެވެ.
