ރަންއިންމޯލްޑިވްސް އަކީ ޓޯޓަލް ފިޓްނެސް ގްރޫޕްގެ ފަރާތުން އިންތިޒާމުކޮށްގެން އަންނަ އެންމެ ބޮޑު އެއް އިވެންޓެވެ. މި އިވެންޓުގެ މަގްސަދަކީ ވީހާވެސް ގިނަމީހުން ދުވުމަށް ލޯބިޖަށްސާ، ޝައުގުވެރިކުރުވުމެވެ. ޓީއެފްޖީ އިން ހިންގަމުން އަންނަ މި މުބާރާތް މިހާރު ވެގެން ގޮސްފައި ވަނީ ރާއްޖޭގައި ހިންގަމުން އަންނަ އެންމެ ބޮޑު އެއް ދުވުމުގެ މުބާރާތަށެވެ.
އަދި ދިވެހި ރާއްޖޭގައި މިހާތަނަށް ކުރިއަށް ގެންދަމުން އަންނަ އެންމެ ބޮޑު ލޯންގް ޑިސްޓެންސް ދުވުމުގެ މުބާރާތް ކަމަށްވާ ދަ ލޯންގްރަން ވެސް މި އިވެންޓް ތަކުގެ ތެރޭގައި ހިމެނެއެވެ. ލޯންގްރަން 2020 މުބާރާތް ސްޕޮންސާ ކޮއްފާވަނީ ކޮކާ ކޯލާގެ ފަރާތުންނެވެ. ކޮކާ ކޯލަ ލޯންގްރަން 2020 ވެގެން ދާނީ ޓޯޓަލް ފިޓްނެސް ގްރޫޕްގެ 27ވަނަ ދުވުމުގެ މުބާރާތަށެވެ. ލޯންގްރަން ފުރަތަމަ ތައާރަފް ކޮއްފާވަނީ 2013 ވަނަ އަހަރުގެ ފެބްރުއަރީ މަހު އެވެ. 2000 މީހުނަށްވުރެ ގިނަ މީހުން ބައިވެރިވާނެ ކަމަށް ލަފާ ކުރެވޭ މިމުބާރާތް މިއަހަރު ކުރިއަށް ގެންދަން ހަމަޖެހިފައި ވަނީ އޭޕްރީލް 10 ވަނަ ދުވަހު ހުޅުމާލޭގައެވެ.
ރަންއިންމޯލްޑިވްސް ސީރީސް ގައި ހަ ދުވުމުގެ އިވެންޓެއް ކުރިއަށް ގެންދެއެވެ. މީގެ ތެރޭގައި، ޖެހިޖެހި ގެން ފަސް ވަނަ ފަހަރަށް ކުރިއަށް ގެންދާ ޓީއެފްޖީ ކަލާރަންއާއި، ހެޕީ މާކެޓްގެ ފަރާތުން މިއަހަރު ސްޕޮންސާ ކޮއްފަވާ ބޮޑުހާފް ނަމަކަށް ކިޔާ އެންޑިއުރަންސް މުބާރާތަކާއި، ލާމު އަތޮޅުގަ ބާއްވަމުން އަންނަ ފީނޯ ޕްރައިވެޓް ލިމިޓެޑް އިން ސްޕޮންސާ ކޮށްފަވާ ރަންއިންލާމު ނަމަކަށް ކިޔާ މުބާރާތެއް ހިމެނެއެވެ.
އަދި މީގެ އިތުރުން ރަންއިންއައްޑޫ ނަމަކަށް ކިޔާ ޑެސްޓިނޭޝަން މުބާރާތެއްވެސް ކުރި އަށް ގެންދިއުމަށް ރާވާފައި ވެއެވެ. އޯގަސްޓް ގައި ބާއްވަން ނިންމާވާފައިވާ މި އިވެންޓަށް އަދި ސަރަހައްދެއް ކަނޑައެޅިފަކާއެއް ނެތެވެ.
ޓީއެފްޖީގެ ފަރާތުން އެންމެ އަވަހަށް ކުރިއަށް ގެންދަން ކަނޑައެޅިފައި ވަނީ އެސްޓީއޯ ގެ ފަރާތުން ސްޕޮންސާ ކޮށްފަވާ އަންހެނުންނަށް ހާއްސަ މުބާރާތެއް ކަމަށްވާ ރަން އިން ރަން ނަމަކަށް ކިޔާ މުބާރާތެކެވެ. މި މުބާރާތް ބޭއްވުމަށް ހަމަޖެހިފާވަނީ މާރޗް 13ގައި ހުޅުމާލޭގައެވެ.
