ރައީސް ޔާމީނުގެ މައްޗަށް ސާބިތުވި ދެ ކުށަކާ ގުޅިގެން އިއްވި 11 އަހަރު ދުވަހުގެ ޖަލު ހުކުމަށް ފަހު އިދިކޮޅު ޕީޕީއެމް ކޯލިޝަނުން ކުރިއަށް ގެންދިޔަ މުޒާހަރާތަކުގައި 16 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.
ރޭގެ މުޒާހަރާއާއި ގުޅިގެން ހައްޔަރުކުރި މީހުންގެ ތެރޭގައި އެ ޕާޓީގެ ސެނެޓާސް ދާއިރާގެ ރައީސުން ހިމެނެ އެވެ.
ފުލުހުންގެ މީޑިއާ އޮފިޝަލް މިއަދު "ސީއެންއެމް" އަށް މައުލޫމާތު ދެއްވަމުން ވިދާޅުވީ، ރޭގެ މުޒާހަރާ އާއި ގުޅިގެން ހައްޔަރު ކުރި އެންމެން ދޫކޮށްލާފައި ވާކަމަށެވެ. އެ މީހުން ދޫކޮށްލީ ރޭގެ ވަގުތެއްގައި ކަމަށްވެސް އޮފިޝަލް ވިދާޅުވި އެވެ.
ރޭ އިދިކޮޅު ފަރާތްތަކުން ކުރިއަށް ގެންދިޔަ މުޒާހަރާގައި ސަރުކާރުގެ އިސް ފަރާތްތަކުން ވަގުތުން ވަގުތަށް އިސްތިއުފާ ދިނުމަށްވެސް ގޮވާލި އެވެ. އަދި ބައެއް ފަރާތްތަކުން ވަނީ، ފޮރިން މިނިސްޓަރު އަބްދުﷲ ޝާހިދު ދިރިއުޅުއްވަމުން ގެންދަވާ ގެ ކޮޅު ކައިރިއަށްވެސް ޖަމާވެ އަޑުގަދަ ކޮށްފަ އެވެ.
އެހެން ނަމަވެސް ފުލުހުންނާއި ސިފައިން އެ ސަރަހައްދަށް ގޮސް މުޒާހަރާގެ ބައިވެރިން ވަނީ، އެ ސަރަހައްދުން ދުރަށް ޖައްސާފަ އެވެ.
އެ ކޯލިޝަނުން މައުލޫމާތު ދޭ ގޮތުގައި މި މުޒާހަރާތައް ރައީސް ޔާމީން މިނިވަން ވަންދެން ސިލްސިލާކޮށް މާލެ އާއި ރާއްޖޭގައި ކުރިއަށް ގެންދިއުމަށް ވަނީ ނިންމާފަ އެވެ.
