ޔޫތް މިނިސްޓްރީން މިކަމާއި ގުޅިގެން ބުނީ، ކޮންމެ އަހަރަކުވެސް ރާއްޖޭގައި އާ އަހަރުގެ ފެށުން ވަރަށް ކުލަގަދަކޮށް ކުރިއަށް ގެންދަމުން އަންނަ ކަމަށާއި، އެހެން އަހަރުތަކެކޭވެސް އެއް ގޮތަށް މި އަހަރުވެސް އާ އަހަރު ފާހަގަ ކުރުމަށް ހާއްސަ ހަރަކާތްތަކެއް ކުރިއަށް ގެންދިއުމަށް ނިންމާފައިވާ ކަމަށެވެ.
އެގޮތުން މި މަހުގެ 31 ވަނަ ދުވަހުގެ ރޭ 20:30 އިން ފެށިގެން ހުޅުމާލޭ ސިންތެޓިކް ޓްރެކުގަ ހާއްސަ މިއުޒިކް ޝޯއެއް ބޭއްވުމަށް ހަމަޖެހިފައިވާ ކަމަށް މިނިސްޓްރީން ވަނީ ބުނެފަ އެވެ.
މި ޝޯ ގައި ރާއްޖޭގެ ކިޅަދާނަ ފަންނާނުންގެ އިތުރުން އިންޑިއާގެ ފަންނާނުންވެސް ބައިވެރިވާނެ ކަމަށެވެ. މީގެ އިތުރުން ޔޫތް މިނިސްޓްރީން ބުނީ މި ޝޯގައި ބޮލީވުޑްގެ މަޝްހޫރު ލަވަކިއުންތެރިޔާ ޕައުނީ ޕާންޑޭގެ ހުށަހެޅުންތައް ފެނިގެންދާނެ ކަމަށެވެ.
ޔޫތް މިނިސްޓްރީން މިހާރު އަންނަނީ، ފައުނީގެ އަޑުން އިވިގެންދިޔަ "ލައިލާ އޯ ލައިލާ" ގެ ލަވަ ހިމަނައިގެން އާ އަހަރުގެ މިއުޒިކު ޝޯ އިޝްތިހާރުވެސް ކުރަމުންނެވެ.
