ރޭ ހ. މީރުމާގޭގައި ކުރިއަށް ދިޔަ ޕީޕިއެމްގެ ސެނެޓުގެ ބައްދަލުވުމުގައި ސެނެޓުން ޝުއޫރު ފާޅުކުރުމުގެ އިތުރުން ސެނެޓުގެ ރިޔާސަތުން ހުށަހެޅި ގަރާރެއް ފާސްކުރުމުވެ.
ރޭގެ ބައްދަލުވުމުގައި ބައިވެރިވި 89 ސެނެޓަރުންގެ ވޯޓުން ފާސްކޮށްފައިވާ ގަރާރުގައި ބުނެފައިވަނީ، ޕީޕީއެމްގެ ރިޔާސީ ކެންޑިޑޭޓް އަދި ރާއްޖޭގެ ކުރީގެ ރައީސް ޔާމީން ޖަލަށް ލުމަށް ހުކުމް ކޮށްފައިވަނީ، "ޖާނީ ދުޝްމަނުން މެދުވެރިކޮށް ފާސިގު ހެކި އުފައްދައިގެން" ކަަމަށެވެ. އަދި ކްރިމިނަލް ކޯޓުން އިއްވި ހުކުމަކީ، އިސްލާމީ ޝަރީއާ އާއި ގާނޫނުތަކާއި ހިލާފު ހުކުމެއް ކަމަށްވެސް ގަރާރުގައި ވަނީ ބުނެފަ އެވެ.
ގަރާރުގައި އިތުރަށް ބުނެފައިވަނީ، ރައީސް ޔާމީން ވަގުތުން ވަގުތަށް މިނިވަން ކުރުމަށް ގޮވާލާ ކަމަށާއި، ޝަރުއީ ނިޒާމަށް ސަރުކާރުން ނުފޫޒު ފޯރުވައިގެން ފަނޑިޔާރުންނަށް ބިރު ދެއްކުމުގެ ސަބަބުން ރާއްޖޭގެ ކޯޓުތަކަށާއި، އަދުލު އިންސާފުގެ ދާއިރާ އަދި ތަހުގީގު އިދާރާތަކަށް ރައްޔިތުން ކުރާ އިތުބާރު ވަނީ ވަރަށް ބޮޑަށް ގެއްލިފައި ކަމަށެވެ. އަދި ސަރުކާރުގެ ވައްކަމާއި ކޮރަޕްޝަނުގެ އިތުރުން ފަސާދަ އާއްމު ވެފައި ވާކަމަށާއި، އެކަމުގެ ސަބަބުން ރައްޔިތުންގެ ހިތުގައި ބިރުވެރިކަމާއި ނުތަނަވަސްކަން ވެރިވެފައި ވާކަމަށް ގަރާރުގައި ވަނީ ބުނެފަ އެވެ.
ގަރާރުގައި އިތުރަށް ބުނެފައިވާ ގޮތުގައި، އެ ކޯލިޝަންގެ މެޖޯރިޓީ އޮންނަ ކައުންސިލް ތަކުން ރައީސް ޔާމީން މިނިވަން ކުރުމަށް ގޮވާލާ ބަޔާން ނެރުމަށާއި، އަދި ރައީސް ޔާމީން މިނިވަން ކުރަންދެން ސަރުކާރަށް އެއްބާރުލުން ނުދޭންވެސް ވަނީ ނިންމާފަ އެވެ.
