މި މަޝްރޫއު އެމްޓީސީސީ އާ ހަވާލުކުރުމަށް ޕްލޭނިން މިނިސްޓްރީގައި ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޖެނެރަލް މެނޭޖަރު ޝިފާއު އަލީއެވެ. ޕްލޭނިން މިނިސްޓްރީގެ ފަރާތުން ސޮއިކުރެއްވީ ޑިރެކްޓަ ޖެނެރަލް ފާތުމަތު ޝާނާ ފާރޫގެވެ.
މި މަޝްރޫއުގެ ދަށުން، 66،701.94 ކިއުބިކް މީޓަރުގެ ސަރަަހައްދެއްގެ ކުރިން ފުންކޮށްފައިވާ ފަޅު އަލުން ފުންކޮށް، 2،205 ކިއުބިކް މީޓަރުގެ ސަރަަހައްދެއްގެ ނެރު ފުންކުރުމާ އެކު، 321.70 މީޓަރުގެ ސަރަހައްދެއްގައި ބޭރުތޮށިލުމުގެ މަސައްކަތް އެމްޓީސީސީން ކުރާނެއެވެ. މީގެ އިތުރުން 95 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި 50 މީޓަރުގެ ސަރަހައްދެއްގައި ގްރޮއިން ޖެހުމުގެ އިތުރަށް 366 މީޓަރުގެ ސަރަހައްދެއްގައި އެއްގަމު ތޮށި ލުމުގެ މަސައްކަތް ވެސް އެ ކުންފުނިން ކުރާނެއެވެ. މި މަޝްރޫއާ އެކު، އެމްޓީސީސީން 1،720 އަކަ މީޓަރުގެ ސަރަހައްދެއްގައި ހާބަ ޕޭމަންޓް ހަދައި، ބަނދަރު ބައްތި އާއި ނެރު ބައްތި ހަރުކުރުމުގެ މަސައްކަތް ކުރާ ގޮތަށްވެސް ވަނީ ހަމަޖެހިފައެވެ.
ޅޮހި ބަނދަރު ތަރައްގީކުރުމުގެ މަޝްރޫއުގެ ދަށުން ބަނދަރުގެ ބޭރު ހިލަ ތޮއްޓާއި އެއްގަމު ތޮށި މަރާމާތު ކުރުމުގެ އިތުރުން ބަނދަރަށް ކޮޅުވެއްޓި ކައިރި ކުރެވޭ ރޭމްޕަކާއި ޑިންގީ އެޅުމަށް ބޭރު ތޮއްޓާއި ދިމާލަށް ކޮންކްރީޓް ޖެޓީއެއް ލުމުގެ މަސައްކަތް އެމްޓީސީސީން ކުރުމަށް ވަނީ ނިންމާފައެވެ. އެ މަސައްކަތްތައް ކުރެވުމުން ބަނދަރުގެ އެއްގަމު ތޮއްޓަށް އިތުރު އޮޑިފަހަރު ކައިރިކޮށް ހެދުމަށް ޖާގަ ލިބިގެންދާނެއެވެ.
ނ.ޅޮހި ބަނދަރު ތަރައްގީ ކުރުމުގެ ކޮންޓްރެކްޓް ގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން. ފޮޓޯ:އެމްޓީސީސީ
ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީ އާ ހަވާލުކޮށްފައިވަނީ 64.87 މިލިއަން ރުފިޔާ އަށް 640 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ. މި މަސައްކަތް ފެށުމަށް ހަމަޖެހިފައިވަނީ އެންވަޔަރަންމަންޓަލް އިމްޕެކްޓް އެސަސްމެންްޓެއް ހެދުމަށް ފަހުގައެވެ.
ޅޮހީގެ ރައްޔިތުން އާންމުކޮށް އަތޮޅުގެ އެކި ރިސޯޓުތަކުގައި ވަޒީފާ އަދާކުރާއިރު، ގިނަ އަދަދެއްގެ ރައްޔިތުން ފަރުމަހުގެ މަސްވެރިކަން ކޮށް އުޅެއެވެ. ރަށުގައި ކަންނެލި މަސްވެރިކަން ކުރާ ދެ އޮޑި އޮންނައިރު އޮޑިފަހަރު ބަނުމަށް ދެ ހަރުގެ ވަނީ ދޫކޮށްފައެވެ. މަސްވެރިންނަށް ހާއްސަ އައިސްޕްލާންޓެއް އެ ރަށުގައި ހުރެއެވެ. ރަށުގެ ރައްޔިތުންގެ އެންމެ އެއް ބޮޑު ކަންބޮޑުވުމަކީ ރަށުގެ ބަނދަރުގެ ހާލަތު ދަށްވުމެވެ. ބަނދަރަށް އަހަރުތަކެއް ވެފައި ވުމާ އެކު، އެއްގަމު ތޮށި އެކި ދިމަދިމާލުން ހަލާކުވެ ގަނބާފައިވާއިރު، ފައިބަންހުރި ސިނޑިތައް ވެސް ވަނީ ހަލާކުވެފައެވެ. ހަމައެގޮތަށް، ބަނދަރުގެ ބޭރު ހިލަ ތޮށި ވަނީ ވަރަށް ބޮޑަށް ރޫޅި އެކި ދިމާލުން ހިލަތައް ފައިބައިގެން ގޮސްފައެވެ.
އެހެންކަމުން، އެމްޓީސީސީން ދެކެނީ މި މަޝްރޫއާ އެކު، 975 މީހުންގެ އާބާދީ އެއް އޮންނަ ޅޮހީގެ ރައްޔިތުންނަށް ލަފާފުރުމުގައި އެތަކެއް ލުއިފަސޭހަ އަކާއި ހިތްހަމަޖެހުމެއް ލިބިގެންދާނެ ކަމަށެވެ. އަދި ބަނދަރު ތަރައްގީ ކުރެވި ފުރިހަމަވެގެން ދިއުމުން އިޖުތިމާއީ ގޮތުންނާއި އިގުތިސާދީ ގޮތުން ރަށުގެ ރައްޔިތުންނަށް ގިނަގުނަ ފައިދާތަކެއް ކުރިމަގުގައި ލިބިގެންދާނެ ކަމަށް އެ ކުންފުނިން އުންމީދު ކުރާ ކަމަށް ވެސް އެމްޓީސީސީން ބުނެއެވެ.
