"ފިލްމު ބާގީ 3"ގެ ތިން ވަނަ ލަވަ އިއްޔެ ނެރެފައިވާއިރު އެލަވައިން ފެނިގެންދަނީ ދިޝާ ޕަޓާނީއެވެ. "ޑޫޔޫ ލަވް މީ" ނަމަކަށް ކިޔާ އެލަވަ ކިޔާފައިވަނީ ނިކިތާއެވެ.
ދެމިނެޓާއި 16 ސިކުންތުގެ އެލަވައިން ދިޝާގެ ފަރި ނެށުން ފެނިގެންދާއިރު ލަވައިގައި ޓައިގާ ޝްރޮފް ވެސް ފެނިގެންދެއެވެ. ނަމަވެސް ޓައިގާގެ ނެށުމެއް މި ލަވައިން ފެނިގެނެއް ނުދެއެވެ.
ލަވައިގައި ޓައިގާ ފެނިގެންދަނީ މީހަކު ހޯދާ މަންޒަރެވެ. މިލަވައަށް ވެސް ބޮޑު ތަރުހީބެއް ލިބެމުން އަންނައިރު ފިލްމުގެ ފުރަތަމަ އަދި ދެ ވަނަ ލަވައަށް ވެސް ވަނީ ބޮޑު ތަރުހީބެއް ލިބިފައެވެ.
ބާގީ ތިނެއް ނެރުމަށް ހަމަޖެހިފައިވަނީ އަންނަ މަހުގެ ހަ ވަނަ ދުވަހުއެވެ. ފިލްމުގައި ލީޑު ރޯލުން ފެނިގެންދަނީ ޓައިގާ އާއެކު ޝްރައްދާ ކަޕޫރެވެ.
ބާގީގެ ފުރަތަމަ ބައި ނެރުނީ 2016 ވަނަ އަހަރެވެ. ފުރަތަމަ ބައިން ލީޑު ރޯލުން ފެނިގެން ދިޔައީ ޓައިގާ އާއި ޝްރައްދާ އެވެ. ފިލްމުގެ ފުރަތަމަ ބަޔަަށް ވަނީ ބޮޑު ތަރުހީބެއް ލިބިފަ އެވެ.
ފިލްމުގެ ދެވަނަ ބައި 2018 ވަނަ އަހަރުގެ ކުރީކޮޅު ނެރެފައިވާއިރު އެފިލްމުގެ ލީޑުން ޓައިގާއާ އެކު ފެނިފައިވަނީ ދިޝާ ޕަޓާނީ އެވެ.
