ރ. މީދޫގައި އޮތް ކެމްޕެއިން ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، އެންމެ ކުޑަ އުޖޫރަ ކަނޑައެޅިއްޖެ ކަމަށާއި، ސާވިސް ޗާޖު ރިސޯޓުތަކުގެ މުވައްޒަފުންނަށް ހަމަޖައްސައި ދެވިއްޖެ ކަމަށެވެ. އެކަމަކު، އަދިވެސް މަހުގެ އަގު އުފުލިފައި ނުވާތީ ހިތާމަކުރައްވާ ކަމަށް ވިދާޅުވި އެވެ.
މަހަށް ރަނގަޅު އަގެއް މަސްވެރިންނަށް ލިބެނީ، ބާނާ މަސް ބަންދުކޮށްގެން ރާއްޖެއިން ބޭރަށް ފޮނުވުމުން ކަން ފާހަގަކުރައްވާ ނަޝީދު ވިދާޅުވީ، ދަޅެއްގައި ބަންދުކޮށްގެން ނުވަތަ މަހުގެ ހަން ދަމާލާފައި ބޭރަށް ފޮނުވިޔަސް އެ އަގު ބޮޑުވެގެން ދާނެ ކަމަށެވެ. އެކަމަކު ހުރިގޮތަށް ހުރި ރޯމަސް ފޮނުވާނަމަ މަހަށް ލިބޭ އަގު ކުޑަ ކަަމަށެވެ.
ރޯމަސް ރާއްޖެއިން ބޭރުކުރަން ފެށީ 1970 ގެ އަހަރުތެރޭގައި ކަން ފާހަގަކުރައްވާ ނަޝީދު ވިދާޅުވީ، އޭގެ ކުރީގައި އަބަދުވެސް މަސް ކައްކައިގެން ކަނީ ކަމަށެވެ. އެމްޑީޕީން ހުށަހެޅި ސިޔާސަތަކީ ރަށްރަށުގައި މަސް ބަންދުކުރެވޭނެ ގޮތް ހެދުން ނަމަވެސް، މި ސަރުކާރުން އެކަން ނުކުރި ކަމަށް ނަޝީދު ވިދާޅުވި އެެވެ.
ނަޝީދު ވިދާޅުވީ، ރާއްޖެ ތަނަވަސްވުުމަށް މަހަށް ރަނގަޅު އަގެއް ލިބުން މުހިންމު ކަމަށެވެ. ރޯމަސް ބޭރަށް ފޮނުވާފައިވާހާ ހިދަކު އެފަދަ ތަނަވަސްކަމެއް ރާއްޖެއަށް ނުލިބޭނެ ކަމަށް ނަޝީދު ވިދާޅުވި އެވެ.
