އެ ވެބްސައިޓްގައި އާއްމުކޮށްފައިވާ ހިސާބުތަކަށް ބަލާއިރު، ވޭތުވެދިޔަ 24 ގަޑިއިރުގެ ތެރޭ ފަސް މެގްނެޓިއުޑް އަށްވުރެ ބާރުގަދަ ތިން ބިންހެލުމެއް ވަނީ ރެކޯޑް ކުރެވިފަ އެވެ. އަދި ހަތަރު މެގްނެޓިއުޑް އާއި ފަސް މެގްނެޓިއުޑްއާއި ދެމެދުގެ 39 ބިން ހެލުމެއް ވަނީ ރެކޯޑް ކުރެވިފައި ކަމަށެވެ.
މީގެ އިތުރުން ހަތަރު މެގްނެޓިއުޑް އާއި ތިން މެގްނެޓިއުޑް އާއި ދެމެދުގެ 88 ބިންހެލުމެއް، އަދި ދެ މެގްނެޓިއުޑް އާއި ތިން މެގްނެޓިއުޑް އާއި ދެމެދުގެ ބާރުމިނުގެ 228 ބިން ހެލުމެއް ރެކޯޑް ކުރެވިފައި ވާކަމަށް އެ ވެބްސްއިޓްގައި އާއްމުކޮށްފައިވާ ހިސާބުތަކުން ދައްކަ އެވެ.
އެ ވެބްސައިޓްގައި ވާގޮތުން ދެ މެގްނެޓިއުޑް އަށްވުރެ ބާރު ދަށް 452 ބިން ހެލުމެއްވެސް ވަނީ ފާއިތުވެދިޔަ 24 ގަޑިއިރުގެ ތެރޭ ރެކޯޑް ކުރެވިފައި ކަމަށާއި، އެހެން ނަމަވެސް މި ބިންހެލުން ތަކަކީ، އޭގެ އަސަރު އާއްމު ގޮތެއްގައި އިންސާނުންނަށް ނުކުރާ ބިންހެލުންތަކެއް ކަމަށް ވަނީ ބުނެފަ އެވެ.
ފާއިތުވި ހަތް ދުވަސް ތެރޭ ދުނިޔޭގެ އެކި ހިސާބުތަކަށް 1،026 ބިން ހެލުމެއް ރެކޯޑް ކުރެވިފައި ވާކަމަށާއި، އޭގެ ތެރެއިން އެންމެ ބާރުގަދަ ބިންހެލުމެއް އައިސްފައިވަނީ، މިމަހުގެ 10 ވަނަ ދުވަހު ރެކްޓާ މިންގަނޑުން 7.9 ގެ ބާރުމިނުގައި އިންޑޮނޭޝިއާ އަށް އައި ބިން ހެލުން ކަމަށްވެސް އެ ރިޕޯޓުގައި ވަނީ ފާހަގަ ކޮށްފަ އެވެ.
އިންޑޮނޭޝިއާގެ ބަންޑާ ސީ ގެ ސަރަހައްދުތަކަށް އައި މި ބިންހެލުމަކީ، ފާއިތުވެދިޔަ 12 މަސް ތެރޭ ދުނިޔެއަށް އައި އެންމެ ބާރުގަދަ ބިންހެލުމެވެ.
މި ބިންހެލުމުގެ ސަބަބުން އިންޑޮނޭޝިއާގެ ޓަނިމްބަރު ރަށްތަކުގައި ހުރި ބައެއް އިމާރާތްތަކަށް ގެއްލުން ވެފައި ވާއިރު، ދެ ސުކޫލަކަށް ވަނީ ގެއްލުންތައް ލިބިފަ އެވެ. އަދި މި ބިންހެލުމުގެ ސަބަބުން އެކަކަށް ބޮޑެތި އަނިޔާތަކެއް ވެފައި ވާއިރު، ގިނަ ބަޔަކަށް ފަރުވާ ދޭން ޖެހުނު ކަމަށްވެސް އެގައުމުގެ އިދާރާތަކުން ވަނީ ރިޕޯޓް ކޮށްފަ އެވެ.
