Advertisement

މި އެއްބަސްވުންތަކުގައި ސޮއި ކުރެއްވީ، ރައީސް އިބްރާހިމް މުހައްމަދު ސޯލިހުގެ ދައުވަތަކަށް ކެމްބޯޑިއާގެ ބޮޑުވަޒީރު ސަމްދެކް އައްކާ މޮހަ ސެނާ ޕަޑައި ޓެކޯ ހުން ސެން ރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މިއަދު ރައީސް އޮފީހުގައި ބޭއްވި ރަސްމިއްޔާތުގެ ތެރެއިންނެވެ. 

ރާއްޖެއާއި ކެމްބޯޑިއާގެ މެދުގައި މިއަދު ބަދަލުކުރެވުނު އެއްބަސްވުންތައް:

1. "ދަ އެގްރީމެންޓް އޮން ވިސާ އެގްޒެމްޕްޝަން ފޯ ހޯލްޑާސް އޮފް ޑިޕްލޮމެޓިކް، އޮފިޝަލްސް އެންޑް އޯޑިނަރީ ޕާސްޕޯޓް". މި އެއްބަސވުމުގެ ދަށުން، ދިވެހިންނަށް ކެމްބޯޑިއާއަށް ދަތުރުކުރުމުގައި ވިސާގެ ލުއިފަސޭހަތައް ހަމަޖައްސައިދެވޭނެ އެވެ.
2.  "މެމޮރަންޑަމް އޮފް އަންޑަސްޓޭންޑިން އޮން ބައިލެޓަރަލް ކޮންސަލްޓޭޝަންސް". މި އެއްބަސްވުމުގެ ސަބަބުން ރާއްޖެއާ ކެމްބޯޑިއާއިން އެކި ދާއިރާތަކުން ގުޅުން ބަދަހިކުރުމާ ގުޅޭގޮތުން މަޝްވަރާކުރުމަށް ފުރުސަތު ލިބިގެންދާނެ އެވެ. 
3.  "މެމޮރަންޑަމް އޮފް އަންޑަސްޓޭންޑިން އޮން ބައިލެޓެރަލް ކޮންސަލްޓޭޝަންސް". މި އެއްބަސްވުމުގެ މަގުސަދަކީ ރާއްޖެއާއި ކެމްބޯޑިއާއާ ދެމެދުގައިވާ އިގްތިސާދީ ގުޅުން ބަދަހިކޮށް، ހަމަހަމަ ކަމާއެކު ދެގައުމަށްވެސް ފައިދާކުރާނެގޮތަށް މި ގުޅުން ހަރުދަނާކުރުމެވެ. 
4. "މެމޮރަންޑަމް އޮފް އަންޑަސްޓޭންޑިން އޮން ހެލްތް ކޯޕަރޭޝަން". މި އެއްބަސްވުމުގެ ދަށުން ސިއްހީ ދާއިރާއިން ދެގައުމުގެ ގުޅުން ބަދަހިކޮށް އެހީތެރިކަން ފޯރުކޮށްދިނުން ހަމަޖެހިފައި ވާކަމަށް ރައީސް އޮފީހުން ވަނީ ބުނެފަ އެވެ. 
5. "މެމޮރަންޑަމް އޮފް އަންޑަރސްޓޭންޑިން އޮން ޓޫރިޒަމް ކޯޕަރޭޝަން". މި އެއްބަސްވުމުގެ ދަށުން ފަތުރުވެރިކަން އިޝްތިހާރުކުރުމާއި، މި ދާއިރާއިން މީހުން ތަމްރީންކުރުމާއި، ދަތުރުފަތުރާއި، ފަތުރުވެރިކަމުގެ ދާއިރާއިން އިންވެސްޓް ކުރުމުގެ ފުރުސަތުތައް ފަހިވެގެންދާނެ އެވެ. 
6. މޯލްޑިވްސް ނެޝަނަލް ޗެމްބާ އޮފް ކޮމާސް އެންޑް އިންޑަސްޓްރީޒް އާއި ކެމްބޯޑިއާ ޗެމްބާ އޮފް ކޮމާސްގެ މެދުގައި ބަދަލުކުރެވުނު އެއްބަސްވުމުގެ ސަބަބުން، ރާއްޖެއާއި ކެމްބޯޑިއާއާ ދެމެދު ވިޔަފާރީގެ ގުޅުންތައް ބަދަހިކުރުމާއި، ވިޔަފާރީގެ ގުޅުންތައް އިތުރުކޮށް، އިންވެސްޓްމަންޓްތައް ފުޅާކުރުމާއި، ދިވެހިރާއްޖެއާއި ކެމްބޯޑިއާއާ ދެމެދު ސިނާއީ ވިޔަފާރިތަކާއި، އިގްތިސާދީ ގުޅުންތައް އިތުރަށް ބަދަހިކުރުމަށް ފުރުސަތުތައް ހުޅުވިގެންދާނެ ކަމަށް ރައީސް އޮފީހުން ވަނީ މައުލޫމާތު ދީފަ އެވެ. 

ރާއްޖެއާ ކެމްބޯޑިއާ ދެމެދު ހަ އެއްބަސްވުމެއްގައި ސޮއި ކުރުމަށް ބޭއްވި ރަސްމިއްޔާތުގެ ތެރެއިން

މިއަދު ބޭއްވި ރަސްމިއްޔާތަށް ފަހު ރައީސް ސޯލިހު އާއި، ކެމްބޯޑިއާގެ ބޮޑުވަޒީރު ވަނީ ގުޅިފައިވާ ބަޔާނެއް ދެއްވާފަ އެވެ. މި ބަޔާނުގައި ރައީސް ސޯލިހު ވިދާޅުވީ، ދެގައުމެއްގެ ދެމެދުގައި އޮންނަ ގުޅުމެއްގެ އެންމެ މުހިއްމު ބަޔަކީ، އެ ދެގައުމެއްގެ ރައްޔިތުންގެ މެދުގައި ބަދަހިވެފައި އޮންނަ ގުޅުންކަމަށެވެ. އަދި ވިސާ ނެގުމަކާއި ނުލައި 30 ދުވަހަށް ދެގައުމުގެ ރައްޔިތުން އެއްގައުމުން އަނެއްގައުމަށް ދަތުރުކުރުމުގެ އެއްބަސްވުމެއްގައި ސޮއިކުރެވުނު ކަމާއި މެދު އުފާކުރައްވާ ކަމަށް ރައީސް ވިދާޅުވި އެވެ.

މީގެ އިތުރުން ރައީސްގެ ވާހަކަފުޅުގައި، ދެގައުމުގެ މެދުގައި ވިޔަފާރީގެ ގުޅުން އިތުރަށް ބަދަހިކުރެއްވުމުގެ ޝައުގުވެރިކަން ފާޅުކުރައްވައި، ކެމްބޯޑިއާގެ ހަނޑުލާއި ދަނޑުވެރިކަމުގެ ދާއިރާގެ އެހެނިހެން ބާޒާރުތަކުން ދިވެހި އިމްޕޯޓަރުންނަށް ފުރުސަތު އޮތްކަން ފާހަގަކުރެއްވި އެވެ.

ރާއްޖެއާ ކެމްބޯޑިއާ ދެމެދު ހަ އެއްބަސްވުމެއްގައި ސޮއި ކުރުމަށް ބޭއްވި ރަސްމިއްޔާތުގެ ތެރެއިން

ކެމްބޯޑިއާގެ ބޮޑުވަޒީރު ދެއްވި ބަޔާނުގައި ވަނީ ކެމްބޯޑިއާގެ ދިފާއީ ބާރުތަކަށް ރާއްޖޭގައި ހިންގާ ޑައިވް ޓްރެއިނިން ކޯސްތަކުގައި ބައިވެރިވުމުގެ ފުރުސަތު ދެއްވި ކަމަށްޓަކައި ރައިސް އަށް ޝުކުރު އަދާކުރައްވާފަ އެވެ. އަދި ކެމްބޯޑިއާގެ މަތީ ތައުލީމު ދޭ ތަންތަނުގައި ދިވެހި ދަރިވަރުންނަށް ކިޔެވުމަށް 10 ސްކޮލަޝިޕް ފުރުސަތެއް ދިނުމަށް ކެމްބޯޑިއާ ސަރުކާރުން ނިންމާފައިވާކަން ވެސް ބޮޑުވަޒީރު އިއުލާނު ކުރެއްވި އެވެ.