ރައީސް ސޯލިހުގެ ހާއްސަ ދައުވަތަކަށް ކެމްބޯޑިއާގެ ބޮޑުވަޒީރު ރާއްޖެ އަށް ވަޑައިގަންނަވާފައިވަނީ މިދިޔަ އާދިއްތަ ދުވަހުގެ ހެނދުނެވެ. ދެ ގައުމުގެ ލީޑަރުންގެ ބައްދަލުކުރެއްވުމަށްފަހު، ރައީސް ސޯލިހް ވިދާޅުވީ އެ ބައްދަލުވުމުގައި ދެ ގައުމުގެ ދެމެދުގައި ވިޔަފާރީގެ ގުޅުން ހަރުދަނާކުރުމަށް މަޝްވަރާ ކުރައްވާފައިވާ ކަމަށެވެ.
ކެމްބޯޑިއާ އާއި ރާއްޖެ އާ ދެމެދު މަޝްވަރާ ކުރެއްވި ކަންކަމުގެ ގޮތުގައި ރައީސް ފާހަގަކުރެއްވީ:
- ކެމްބޯޑިއާގެ ހަނޑޫ އެތެރެކުރުން
- ޒުވާރި، ދަނޑިއަލުވި، މިރުސް، ކެޝޫނަޓްގެ އިތުރުން މޭވާގެ ބާވަތްތައް އެތެރެކުރުން
- ކާބޯތަކެތީގެ އިތުރުން ފޭރާމުގެ ބާވަތްތަކާއި ދަތުރުފަތުރާ ގުޅުންހުރި މުދަލާއި ލަކުޑީގެ ބާވަތްތައް އެތެރެކުރުން
ކެމްބޯޑިއާގެ ބޮޑުވަޒީރާ އެކު، ރައީސް ސޯލިހު ވާހަކަފުޅު ދައްކަވަނީ - ފޮޓޯ:ރައީސް އޮފީސް
މީގެ އިތުރުން ރައީސް ފާހަގަކުރެއްވި ގޮތުގައި ރާއްޖޭގައި ތައްޔާރުކުރާ ދަޅުމަހާއި ކަނޑުމަހުގެ އުފެއްދުންތައް ކެމްބޯޑިއާ އަށް އެކްސްޕޯޓް ކުރުމާ ގުޅޭ ގޮތުން ވެސް އެ ބައްދަލުކުރެއްވުމުގައި މަޝްވަރާ ކުރައްވާފައިވާ ކަމަށެވެ.
ރައީސް ސޯލިހާ އެކު، ކެމްބޯޑިއާގެ ބޮޑުވަޒީރު ވާހަކަފުޅު ދައްކަވަނީ - ފޮޓޯ:ރައީސް އޮފީސް
ކެމްބޯޑިއާގެ ބޮޑުވަޒީރު ރާއްޖެ އަށް ކުރައްވަމުން ގެންދަވާ ރަސްމީ ދަތުރުފުޅުގެ ހަވާސާ ގައި ރާއްޖެ އާއި ކެމްބޯޑިއާގެ ވިޔަފާރިވެރިންގެ ޖަމިއްޔާ އިން ބިޒްނަސް ފޯރަމެއް ވެސް ވަނީ ބާއްވާފައެވެ.
