އިތުބާރު ހުރި މަސްދަރުތަކުން މައުލޫމާތު ލިބިފައިވާ ގޮތުގައި ވަކިވަކިން ހިނގާފައިވާ މި ދެ ހާދިސާގައި ގެއްލިފައިވަނީ މަސްތުވާތަކެއްޗާ އެކު ރާއްޖެ އައި ދެ މީހަކު ކަސްޓަމްސް އިން އަތުލައިގަތް ފަހުންނެވެ. މީގެ ތެރެއިން އެއް ހާދިސާގައި މަސްތުވާތަކެތި ހުރި ލަގެޖް ގެއްލިފައިވާއިރު، އަނެއް ހާދިސާގައި ލަގެޖާއެކު މަސްތުވާތަކެތި ގެނައި ކަމަށް ބެލެވޭ މީހާވެސްވަނީ ގެއްލިފައެވެ. މި މައްސަލަ ފުލުހުން ބަލަމުން އަންނަކަމަށް ޔަގީން ކުރެވިފައިވީނަމަވެސް މި ކަމާ ގުޅޭ ގޮތުން ފުލުހުންވެސް ރަސްމީ އެހެން އިދާރާއަކުންވެސް އަދި ވާހަކަ ނުދައްކައެވެ.
ރިޕޯޓްތައް ބުނާ ގޮތުގައި މިއިން އެއް ހާދިސާގައި ހިމެނޭ މަސްތުވާތަކެތީގެ ބަރުދަން ތިރީހަކަށް ކިލޯއަށް އަރާއިރު އަނެއް ހާދިސާގައި ހިމެނެނީ ސޯޅަ ކިލޯގެ މަސްތުވާތަކެއްޗެވެ. އެހެންކަމުން ގެއްލިފައިވާ ތަކެތީގެ ބަރުދަން ފަންސާހަކަށް ކިލޯއާ ގާތް ކުރާއިރު މިއީ އެތައް މިލިއަން ރުފިޔާއެއްގެ މަސްތުވާތަކެއްޗެވެ.
މައުލޫމާތު ލިބިފައިވާ ގޮތުގައި މީގެން އެއް ހާދިސާއަކީ މި ހަފްތާގެ ހާދިސާއެކެވެ. އަނެއް ހާދިސާއަކީ މީގެ ދުވަސްކޮޅެއް ކުރިން ހިނގި ހާދިސާއެކެވެ. އެއާޕޯޓަކީ 24 ގަޑިއިރު ފުލުހުންނާއި ސިފައިންވެސް ހަރަކާތްތެރިވާ ތަނަކަށްވެފައި، އަދި ސީސީޓީވީ ކެމެރާ ހަރުކުރެވި 24 ގަޑިއިރު މޮނިޓާ ކުރެވެމުންދާ ތަނަކަށްވާއިރު މި ހާދިސާ ހިނގަން ދިމާވި ސަބަބު އަދި ސާފެއް ނުވެއެވެ.
