މުލީ ބަނދަރުގެ މަސައްކަތް ރަމްޒީ ގޮތުން ފަށްޓަވައިދެއްވީ، ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އިކްރާމް ހަސަންއާއި، އެމް.ޓީ.ސީ.ސީގެ ސީ.އީ.އޯ އާދަމް އާޒިމެވެ. މުލީގައި ޒަމާނީ ފެންވަރުގެ ބަނދަރެއް ތަރައްޤީކުރުމުގެ މަސައްކަތް ޕްލޭނިންގ މިނިސްޓްރީ އެމް.ޓީ.ސީ.ސީއާއި ޙަވާލުކޮށްފައިވަނީ މިދިޔަ ނޮވެމްބަރު މަހުގެ 28 ވަނަ ދުވަހުއެވެ.
މުލީ ކައުންސިލްގެ ރައީސް ޝަމްއޫން ރަމީޒު ސީއެންއެމްއަށް ކުރިން ވިދާޅުވީ، މި ދިޔަ އަހަރުގެ ފަހުކޮޅު ރައީސް އިބްރާހީމް މުހައްމަދު ސޯލިހު މުއްޔަށް ކުރެއްވި ދަތުރުފުޅުގައި ބަނދަރު މަރާމާތު ކުރުމުގެ މަސައްކަތް ވަރަށް އަވަހަށް ފެށޭވަރުވާނެ ކަމުގެ ޔަގީންކަން ދެއްވާފައިވާ ކަމަށެވެ. ބަނދަރުގެ މަސައްކަތް ފެށުނީ އެކަމަކު ރައީސް ވިދާޅުވި ތާރީހަށްވުރެ ފަހުންނެވެ.
މ. އަތޮޅު ވެރިކަން ކުރާ މުލީގެ ބަނދަރަކީ 2001 ވަނަ އަހަރު ތަރައްގީކުރި ބަނދަރެކެވެ. ރީޖަނަލް ހޮސްޕިޓަލް ، ބޭންކް އޮފް މޯލްޑިވްސް، އަތޮޅު ކައުންސިލް ފަދަ މުހިންމު މުއައްސަސާތައް ގާއިމްވެފައިހުރީ މުލީގައި ކަމުން ކޮންމެ ދުވަހަކުވެސް އަސާސީ އެތައް ހިދުމަތެއް ލިބިގަތުމަށް އަތޮޅު ރަށްތަކުގެ ރައްޔިތުން މުއްޔަށް އައިސް ބަނދަރު ބޭނުންކުރެއެވެ. ނަމަވެސް މުލީ ބަނދަރުގެ މިހާރުގެ ހާލަތުން މިފަރާތްތަކަށްވެސް ތަކްލީފްތައް އުފުލަން ޖެހޭކަމަށް ކައުންސިލް ރައީސް ޝަމްއޫން ކުރިން ފާހަގަކުރިއެވެ.
