ރާއްޖޭގެ ކަނޑުދަތުރުފަތުރު ކުރުމުގެ ސިނާއަތަށް ހާއްސަކޮށްގެން ބާއްވާ އެންމެ ބޮޑު އިވެންޓު މޯލްޑިވްސް މެރިން އެކްސްޕޯ އަންނަ މާޗު މަހު ބާއްވަން ތައްޔާރުވެއްޖެއެވެ.
Advertisement
ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) އިން 2014 ވަނަ އަހަރުން ފެށިގެން ކޮންމެ އަހަރަކު ބާއްވަމުން އަންނަ މި އެކްސްޕޯ މި އަހަރު ބޭއްވުމަށް ހަމަޖެހިފައިވަނީ އަންނަ މާޗު މަހުގެ 15 އިން 18 ވަނަ ދުވަހުގެ ނިޔަލަށް ހުޅުމާލެ ސެންޓްރަލް ޕާކުގައެވެ.
ކޮންމެ ދުވަހެއްގެ ހަވީރު 3:00 އިން ރޭގަނޑު 11:00 އަށް ކުރިއަށް ގެންދިއުމަށް ނިންމާފައިވާ މި އެކްސްޕޯގައި އެގްޒިބިޓަރުންގެ ގޮތުގައި ޖުމްލަ 36 ފަރާތަކުން މި އަހަރު ބައިވެރިވެފައިވެއެވެ. އޭގެ ތެރޭގައި:
- ކަނޑު އުޅަނދުފަހަރު ބަނުމާއި ކާގޯ އަދި ފަސިންޖަރުން އުފުލުމާއި ލޮޖިސްޓިކްސްގެ ހިދުމަތްދޭ ކުންފުނިތައް
- ޑައިވިން އާއި ވޯޓާ ސްޕޯޓްސް އަދި އެކްސްކާޝަން ދާއިރާގައި ހަރަކާތްތެރިވާ ފަރާތްތައް
- މަސްވެރިކަމުގެ ދާއިރާގައި ހަރަކާތްތެރިވާ ކުންފުނިތައް
މި ފަހަރުގެ މެރިން އެކްސްޕޯ ކުރިޔަށް ގެންދިއުމަށް ހަމަޖެހިފައިވަނީ އޭޝިއާ ޑައިވް އެކްސްޕޯ މޯލްޑިވްސް (އެޑެކްސް) އާ ގުޅިގެންނެވެ. މި އަހަރުގެ މެރިން އެކްސްޕޯގައި:
- ތަފާތު އެކި އުފެއްދުންތައް މާކެޓަށް ތައާރަފު ކުރާނެ
- މިހާރު މާކެޓުގައި ހުރި އުފެއްދުންތަކާ ބެހޭ މައުލޫމާތު ދޭނެ
- ކަނޑުދަތުރުފަތުރު ކުރުމާއި މަސްވެރިކަން ފަދަ ސިނާއަތްތަކުގައި ބޭނުން ކުރަމުން އަންނަ އާލާތްތަކަށް އައިސްފައިވާ ކުރިއެރުމާ ގުޅޭގޮތުން މައުލޫމާތު ހިއްސާ ކުރާނެ
- ކަނޑުދަތުރުފަތުރުގެ ސިނާއަތާ ގުޅުންހުރި ތަފާތު އެކި މައުލޫތަކަށް ޕެނަލް ޑިސްކަޝަންތައް ކުރިޔަށް ގެންދާނެ
- ސަރުކާރުގެ އިސްފަރާތްތަކާއި ބޭރު ގައުމުތަކުގެ ޑިޕްލޮމެޓުން އެކްސްޕޯ އަށް ޒިޔާރަތް ކުރުމުގެ ހަރަކާތްތައް ކުރިއަށް ދާނެ
މި އެކްސްޕޯގައި ދިވެހި ކަނޑުން ބާނާ މަހުން އުފައްދާ އެކި އުފެއްދުންތަކަށް ހާއްސަ ސަރަހައްދެއް ކަނޑައަޅާފައިވާއިރު، ކަނޑާ ގުޅުންހުރި ތަފާތު އެކި ކާނާގެ ރަހަ ބެލުމާއި ވަގުތުން ކެއްކުމުގެ ހަރަކާތްތައް ކުރިޔަށް ގެންދާނެއެވެ. އަދި ރާއްޖޭގައި ވިއްކަމުންދާ ތަފާތު އެކި ކަނޑު އުޅަނދުފަހަރާއި އެ އުޅަނދުތަކަށް ހާއްސަ އާލާތްތަކުގެ އިތުރުން އިންޖީނުތަކަށް ހާއްސަ ވަކި ސަރަހައްދެއް ކަނޑައަޅާފައި ހުންނާނެއެވެ.
މޯލްޑިވްސް މެރިން އެކްސްޕޯ 2023
- ކޯ ސްޕޮންސަރު - ގަލްފް ކުރާފްޓް
- އޮފިޝަލް ފިއުލް ޕާޓުނަރު - ދަ ހޯކްސް ޕްރައިވެޓް ލިމިޓެޑް
- އޮފިޝަލް ޕުރޮޑަކްޓް - ހަސަން މެރިންގެ މާކިއުރީ އިންޖީނު
- އޮފިޝަލް ސަޕްލަޔަރު - މެރިން އިކުއިޕްމަންޓްސް
- ވޯޓާ ސްޕޯޓްސް ޕާޓުނަރު - އޯޝަން ގުރޫޕު މޯލްޑިވްސް
- އޮފިޝަލް ޑައިވް އިކުއިޕްމަންޓު ސަޕްލަޔަރު - ސީގިއާ
