"ކުއީން އޮފް ސްކައިސް" ގެ ނަމުން ނަން ދީފައިވަނީ ބޮއިންގް 747 އެއާކްރާފްޓަކަށެވެ. އިނގިރޭސިވިލާތުގެ ނޫސްތަކުން ބުނީ މިއީ މިދިޔަ އަހަރު އަވްހާރަވި އެގައުމުގެ ކުރީގެ ރާނީ ކުއިން އެލިޒަބަތު ދެވަނަގެ ނަމަށް ހާއްސަކޮށްފައިވާ ބޯޓެއް ކަމަށެވެ.
މީގެކުރިންވެސް ވާޖިން އެޓްލާންޓިކުންވަނީ ފާހަގަކޮށްލެވޭ ކަނބަލުންގެ ނަމުން އެއާލައިންގެ ބޯޓްތަކަށް ނަން ދީފައެވެ.
އެގޮތުންއިނގިރޭސި ސުފްރެޖެޓް ލީޑަރު އެމެލީން ޕެންކްހަރސްޓް، ލަވަކިޔުންތެރިޔާ ބިލީ ހޮލިޑޭ އަދި ޕްރިންސެސް އޮފް ވޭލްސް ޑަޔާނާއަށް ނިސްބަތްކޮށްވެސް މީގެކުރިން ބޯޓްތަކަށް ނަންދީފައި ވެއެވެ.
"ކުއީން އޮފް ސްކައިސް"ގެ ނަމުން ނަންދިން ބޯޓްގައި އަންހެނަކު ރަތް ހެދުމެއްގައި އިނގިރޭސިވިލާތުގެ ދިދަ އުފުލާ މަންޒަރުވެސް ތަސްވީރުކޮށްފައި ވެއެވެ.
މިދިޔަ އަހަރު ސެޕްޓެމްބަރު މަހު އަވަހާރަވި ކުއިން އެލިޒަބަތަކީ އެކަމަނާގެ ވެރިކަމުގައި ވަރަށް ގިނައިން ދަތުރުކުރެއްވި ބޭފުޅެކެވެ. އެގޮތުން އެކަމަނާވަނީ 120 ގައުމަކަށް ދަތުރުކުރައްވާފައެވެ.
