މަޖިލީހުގެ ޖަލްސާ ފައްޓަވަމުން ވާހަކަ ދައްކަވަމުން ރައީސް ނަޝީދު ވިދާޅުވީ، އެންމެ ކުޑަ އުޖޫރަ ކަނޑައެޅުމަށް އިކޮނޮމިކް މިނިސްޓްރީން އެކުލަވާލި ރިޕޯޓާއި އެކު މަޖިލީހަށް ސިޓީއެއް ފޮނުވާފައިވާ ކަމަށެވެ. ފެބްރުއަރީ 18 ވަނަ ދުވަހު މަޖިލީހުގެ އިގްތިސާދީ ކޮމިޓީއަށް އެ ރިޕޯޓް ފޮނުވާފައިވާކަން ފާހަގަ ކުރައްވާ ރައީސް ނަޝީދު ވިދާޅުވީ އެ ރިޕޯޓް މިވަގުތު އޮތީ އިގްތިސާދު ކޮމިޓީގައި ކަމަށެވެ.
އިކޮނޮމިކް މިނިސްޓްރީން އެކުލަވާލި ރިޕޯޓަށް އިގްތިސާދު ކޮމިޓީގައި ބަހުސް ކުރެވޭކަމަށާއި، އަދި ކޮމިޓީން ކަމާއި ގުޅޭ އެންމެހާ ފަރާތްތަކަށް މަޝްވަރާ ކުރާނެ ކަމަށް ވެސް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ، އިކޮނިމިކް މިނިސްޓަރު އެދިލައްވާފައިވަނީ މަޖިލީހުގެ ލަފަޔަކަށް ކަމަށާއި، އެންމެ ކުޑަ އުޖޫރަ ކަނޑައެޅުން އޮތީ އިކޮނޮމިކް މިނިސްޓަރަށް ކަމަށެވެ.
އަދި ކަމާއި ގުޅޭ ހުރިހާ ފަރާތަކާއި މަޝްވަރާ ކުރުމަށްފަހު މަޖިލީހުގެ މަސައްކަތުގެ ތެރެއިން އެކަން ކުރެވޭނެ ކަމަށް ވެސް ރައީސް ނަޝީދު ވިދާޅުވި އެވެ.
ފެބްރުއަރީ މަސް ނިމުމުގެ ކުރިން އެންމެ ކުޑަ އުޖޫރަ ނުވަތަ މިނިމަމް ވޭޖެއް ކަނޑައަޅުއްވާނެ ކަމަށް އިކޮނޮމިކް މިނިސްޓަރު ފައްޔާޒު ވިދާޅުވުމަށް ފަހު، މަސް ނިމުނުއިރު ވެސް އެކަން ކުރެވިފައި ނުވާތީ މިނިސްޓަރު ވަނީ މާފަށް އެދިފައެވެ.
