ރައީސް ސޯލިހު މިހެން ވިދާޅުވެފައިވަނީ މިއަދު ރައްޔިތުން މަޖިލީހުގައި އިއްވެވި ރިޔާސީ ބަޔާނުގައެވެ.
ދުރު ރާސްތާގައި ރާއްޖޭގެ އިގުތިސޯދު ސިންދަފާތުކުރުމުގެ ގޮތުން އިންފޮމޭޝަން ޓެކްނޮލޮޖީގެ ދާއިރާ ކުރިއެރުވުމަކީ ސަރުކާރުން ހާއްސަ އިސްކަމެއްދީގެން ކުރަމުން އަންނަ މަސައްކަތަކަށްވީއިރު، ރައީސް ސޯލިހުގެ ރިޔާސީ ބަޔާނުގައި ވަނީ އެކަމަށް އަލިއަޅުވާލައްވާފައެވެ.
ރިޔާސީ ބަޔާން އިއްވަވަމުން ރައީސް ސޯލިހު ވިދާޅުވީ އިންޓަނެޓުގެ ޒަރިއްޔާއިން ކުރެވޭ މުއާމަލާތްތަކާއި ހިންގުމުގެ ދާއިރާއަށް އަންނަ އަވަސް ކަމަކީ ކުރިއަށް އޮތް ތަނުގައި މުހިންމު ބަދަލަކަށްވާނެ ކަމަށެވެ. ރާއްޖޭގެ އިންޓަނެޓުގެ އަގަށް ގެނެވުނު ބަދަލާ އެކު އޭގެ ސްޕީޑަށް އަދިވެސް އިތުރު ތަރައްގީ އައުން މުހިންމު ކަމުގައި ރައީސް ވިދާޅުވިއެވެ. ސަރުކާރު ޝާމިލްވާ އާ ސަބްމެރިން ކޭބަލާ އެކު އިންޓަނެޓުގެ ސްޕީޑަށް އިތުރު ފަހިކަން ލިބިގެންދާނެކަމަށް ރައީސް ވިދާޅުވިއެވެ.
ރައީސް ވިދާޅުވި ގޮތުގައި ސަބްމެރިން ކޭބަލްގެ މި މަޝްރޫއުގެ ސަބަބުން ރާއްޖޭގައި އިންޓަނެޓުގެ އަގު ހެޔޮވެ، އިންޓަނެޓުގެ ސްޕީޑަށް އިންގިލާބީ ބަދަލެއް ގެނުވާނެ ކަމުގައެވެ. އަދި މި މަޝްރޫއު ވެގެންދާނީ އުފެއްދުންތެރި ޒުވާނުންނާއި ވިޔަފާރިތައް ދުނިޔޭގެ މާކެޓްތަކާ ގުޅުވައިދޭނެ ވަސީލަތެއް ކަމުގައި ކަމަށް ވެސް ރައީސް ފާހަގަކުރެއްވިއެވެ.
ސަރުކާރުގެ ފަރާތުން ރާއްޖޭގައި އަޅާ ފުރަތަމަ ސަބްމެރިން ކޭބަލްގެ މަސައްކަތް ކުރުމަށް ހަވާލުކޮށްފައިވަނީ އިންޑިއާގެ ބިލިއަނަރު މުކޭޝް އަންބާނީގެ ރިލަޔަންސް ޖިއޯ ކުންފުންޏާއެވެ. މި މަޝްރޫއުގެ އެއްބަސްވުމުގައި އޯޝަން ކަނެކްޓް މޯލްޑިވްސްއިން ރިލަޔަންސް ޖިއޯ ކުންފުންޏާ އެކު ސޮއިކޮށްފައިވަނީ މިދިޔަ އަހަރުގެ ފެބްރުއަރީ މަހުގެ ތެރޭގައެވެ.
މި ސަބްމެރިން ކޭބަލް މެދުވެރިކޮށް ރާއްޖެ އާއި މުންބާއީ އާއި ސިންގަޕޫރުގެ އިތުރުން މި ސަރަހައްދުގެ އެހެނިހެން ހިސާބުތަކާ ގުޅުވާލުމަށް ވަނީ ހަމަޖެހިފައެވެ. ސަރުކާރުން ދެކޭ ގޮތުގައި މި ކޭބަލްގެ ސަބަބުން މި ސަރަހައްދުގެ ވިޔަފާރި ކުރިއަރައިގެން ދިއުމާ އެކު، ޑިޖިޓަލް ޓްރާންސްފޮމޭޝަނަށް ރާއްޖޭން ކުރަމުންދާ މަސައްކަތަށް އިތުރު ކުރިއެރުން ލިބޭނެއެވެ.
ސަރުކާރުން ގާއިމުކުރާ މި ކޭބަލްގެ އިތުރުން، ދިރާގާއި އުރީދޫ މޯލްޑިވްސް ގުޅިގެން ރާއްޖެ އާ ސްރީ ލަންކާ އާ ދެމެދު ފައިބަ އޮޕްޓިކް ސަބްމެރިން ކޭބަލެއް އެޅުމުގެ މަސައްކަތް ދަނީ ކުރަމުންނެވެ. އެ ޕްރޮޖެކްޓުގެ 45 އިންސައްތަ ދިރާގުން ހިއްސާ ކުރާއިރު 45 އިންސައްތަ އުރީދޫން އަދި ޑައަލޮގް އެޒިއޭޓާއިން 10 އިންސައްތަ ހިއްސާކުރެއެވެ.
