މިގޮތުން ފުރަތަމަ ފިޔަވަޅެއްގެ ގޮތުން އަފްގާނިސްތާނުގެ މައި ދެ ސިޓީއެއްގައި ކޮންޓްރެސެޕްޓިވްސް (ދޭތެރެ ދުރުކުރަން ބޭނުންކުރާ ބޭސް) ވިއްކުން ތާލިބާނުން ވަނީ ހުއްޓާލާފައެވެ.
ތާލިބާނުން ބުނެފައިވަނީ ދޭތެރެދުރުކުރަން ބޭނުންކުރާ ބޭސްވިއްކުމަށް ކުރާ ކެންޕޭނަކީ "މުސްލިމް އާބާދީ ކޮންޓްރޯލް ކުރުމަށް ހުޅަނގުގެ ރޭވުމެއް" ކަމަށެވެ.
ގާޑިއަން އިން ރިޕޯޓްކޮށްފައިވާ ގޮތުގައި ތާލިބާނުން ދޮރުން ދޮރަށް ގޮސް ބިރުދައްކައި، ވިހެއުން ކޮންޓްރޯލްކުރާ ބޭހާއި އެހެނިހެން އާލާތްތައް ނުވިއްކަން ބޭސްފިހާރަތަކަށް ވަނީ އަންގާފައެވެ.
މީގެއިތުރުން ފޫޅަމައިންނަށްވެސް ދޭތެރެ ދުރުކުރުމާގުޅޭ ގޮތުން މައުލޫމާތު ނުދިނުމަށްވެސް ވަނީ އަންގާފައެވެ.
ތާލިބާނުން އެގައުމުގެ ވެރިކަމަށް އައީ އެމެރިކާގެ ސިފައިން 2021 ވަނަ އަހަރުގެ އޮގަސްޓް މަހު އެގައުމުން ފޭބުމާއެކުއެވެ.
ވެރިކަމަށް އައިފަހުން ތާލިބާނުން ވަނީ އަންހެން ކުދިންގެ މަތީ ތައުލީމު ދިނުން މަނާކޮށް އަންހެންކުދިންގެ ޔުނިވާސިޓީތައް ވެސް ބަންދުކޮށްފައެވެ. މޫނު ބުރުގާ ނާޅާ އަންހެނުން މަގުމައްޗަށް އެކަނި ނުކުތުން ވެސް ވަނީ މަނާކޮށްފައެވެ.
