އިލެކްޝަން ކޮމިޝަނުން އިއްޔެ ވަނީ މި މަހުގެ 21 ވަނަ ދުވަހުގެ ނިޔަލަށް ސިޔާސީ ޕާޓީތަކަށް މެމްބަރުންގެ ގޮތުގައި ދަފްތަރު ކުރެވިފައިވާ އަދަދުގެ ލިސްޓެއް އާންމުކޮށްފައެވެ.
އިއްޔެ އާންމުކުރި ލިސްޓުގައި އެމްއާރްއެމްގައި މިވަގުތު ތިބި ކަމަށް ދައްކަނީ 2981 މެންބަރުންނެވެ.
ސިޔާސީ ޕާޓީ ތަކުގެ ތެރެއިން 3000 މެންބަރުން ހަމަނުވާ ޕާޓީތަކަށް ތިން މަސް ދުވަހުގެ ނޯޓިސް ދިނުމަށްފަހު އުވާލާނެ ކަމަށް މިދިޔަ އަހަރުގެ ޖޫން މަހުގެ ތެރޭގައި ނިންމާ އޭރު ވެސް 3000 ހަމަނުވާ ސިޔާސީ ޕާޓީތަކަށް ނޯޓިސް ދިން އިރު އެމްއާރްއެމް ހިމެނުނެވެ. އެއީ މިދިޔަ އަހަރުގެ އެ މުއްދަތުގައި އެމްއާރްއެމްގައި ތިބީ 2300 މެންބަރުންނެވެ.
އިލެކްޝަނުން އިއްޔެ އާންމުކުރި ލިސްޓުގައި އެންމެ މެންބަރުންގިނަ ޕާޓީއެއްގެ ގޮތުގައި އޮތީ 57660 މެމްބަރުންނާއެކު އެމްޑީޕީއެވެ. ދެވަނަ އަށ އެންމެ މެންބަރުން ގިނައީ ޕީީޕީއެމްގައެވެ. ޕީީޕީއެމްގައި 38704 މެންބަރުން ތިބި އިރު ތިން ވަނަ އަށް މެންބަރުން ގިނަ ޕާޓީއެއްގެ ގޮތުގަައި އޮތީ 22607 މެންބަރުންނާއެކު ޖުމްހޫރީ ޕާޓީއެވެ.
އެމްއާރްއެމް އަކީ ރައީސް މައުމޫނު އުފެއްދެވި ތިން ވަނަ ޕާޓީއެވެ. ފުރަތަމަ އެމަނިކިުފާނު ވުޖޫދުކުރެއްވީ ޑީއާރްޕީއެވެ. އޭގެ ފަހުން މަައުމޫނު ވަނީ ޕީޕީއެމް އުފައްދާ ރަޖިސްޓްރީ ކޮށްފައެވެ.
އިލެކްޝަންގެ ލިސްޓުގައިވާ ގޮތުން ރާއްޖޭގައި އޮތް ސިޔާސީ ޕާޓީ ތަކުގެ ތެރެއިން ދެން 3000 މެންބަރުން ހަމަނުވަނީ ޑީއާރުޕީ އާއި މޯލްޑިވްސް ލޭބާ އެންޑް ސޯޝަލް ޑިމޮކްރަޓިކް ޕާޓީއެވެ.
