ރައްޔިތުންގެ ހިޔާލު ހޯދުމަށް މި ބައްދަލުވުމުގައި ރައްޔިތުންގެ އެންމެ ބޮޑު ކަންބޮޑުވުން އޮތީ ވިޔަފާރިވެރިންގެ ދިފާއުގައި ސަރުކާރުން އަދި މަޖިލީހުން ވިސްނާކަމަށް ބުނެއެވެ.
އާންމު ފަރާތްތަކުން ފާޅުކުރި ހިޔާލުގައި ބުނެފައިވަނީ، އިގްތިސާދުގެ ވާހަކަ ދައްކާއިރު ދައްކަނީ ހަމައެކަނި ވިޔަފާރިވެރިންގެ ވާހަކަކަމަށާއި، މަސައްކަތް ކުރާ މީހާގެ ވާހަކަ ނުދައްކާ ކަމަށެވެ. އަދި މިނިމަމް ވޭޖްގެ ވާހަކަ ދައްކާއިރު މަސައްކަތްކުރާ މީހާ އުޅޭ ހާލާއި އޭނާގެ ދިރިއުޅުމުގެ ފެންވަރު ހުރިގޮތަށް ރިއާޔަތް ކޮށް ވާހަކަ ނުދެއްކާކަމަށް ބައެއް ފަރާތްތަކުން ފާހަގަ ކޮށްފައިވެއެވެ.
ރޭގެ ބައްދަލުވުމުގައި ބައވެރިވި ބައެއް ފަރާތްތަކުން ބުނެފައިވަނީ ރައްޔިތުންގެ ހައްގުގެ ވާހަކަ އަދި އިންސާނީ ހައްގުގެ ވާހަކަ ދައްކަންޖެހޭކަމަށެވެ. އިންސާނީ ހައްގަކީ ހަމައެކަނި ޖަލުގައި ނުތެޅުން ނޫންކަމަށާއި، ހަމަ މުސާރައަކާއި އާއިލާ އާއި ވަގުތު ހޭދަކުރުމަށް ލިބުމަކީވެސް އިންސާނީ ހައްގެއްކަމަށް ބުނެފައިވެއެވެ.
ރަނގަޅު ޖީލެއް ބިނާކުރުމަށް އާއިލާ އާއިއެކު އެކަށީގެންވާ ވަގުތު ހޭދަކުރުމުގެ ފުރުސަތު ލިބެންޖެހޭ ކަމަށްވެސް ބައެއް ފަރާތްތަކުން ފާހަގަ ކޮށްފައިވެއެވެ. އަދި އެ ފުރުސަތު ނުލިބި ޖީލެއް ހަލާކުވުމުން ދައުލަތަށް ލިބޭގެއްލުން ބޮޑުވާނެ ކަމަށާއި، ރަނގަޅު ޖީލެއް ބިނާކުރެވުމަކީ ނުހަނު ބޭނުންތެރިކަމެއްކަން ބައެއް ފަރާތްތަކުން ފާހަގަ ކޮށްފައިވެއެވެ.
މީގެ އިތުރުން ވޭޖް އެޑްވައިޒަރީ ބޯޑުގެ ޗެއާމަން މަރިޔަމް ހާލިދާ މި ބައްދަލުވުމުގައި ވިދާޅުވެފައިވަނީ، ކުދި އަދި މެދުފަންތީގެ ވިޔަފާރިތަކާއި ގުޅޭ ދިރާސާތަކެއް ކުރެއްވި ކަމަށެވެ. އެހެން ނަމަވެސް ބޭނުންވި ވަރުގެ ނަތީޖާއެއް ނުނެރެވުނު ކަމަށާއި، އެހެން ނަމަވެސް ކުދި އަދި މެދުފަންތީގެ ވިޔަފާރިތަކަށް އަންނާނެ ލޮޅުން އިގޭކަމަށެވެ. ހާލިދާ ވިދާޅުވީ އެކި ބިލްތަކާއި ބަލިވުމުން ހަރަދުކުރަންޖެހޭނެ ވަރާއި ކެއުމަށް ހަރަދުކުރަންޖެހޭނެ ވަރަށް ބެލުމުން އެންމެ ކުޑައުޖޫރައަށް ލިބުނީ 8600 ރުފިޔާ ކަމަށެވެ.
އެއަދަދު 6400 ރުފިޔާއަށް ކުޑަކުރީ އިގްތިސާދަށް ވަރަށް ބޮޑަށް ބަލާފައިކަމަށް ހާލިދާ ވިދާޅުވި އެވެ. ހާލިދާ ވިދާޅުވީ ކުދި އަދި މެދުފަންތީގެ ވިޔަފާރި ތަކުގައި މަސައްކަތްކުރާ މަސައްކަތްތެރިންނަށްވެސް އެމީހުންގެ އަސާސީކަންކަން ކުރެވެންޖެހޭ ވަރެއް ލިބެންޖެހޭ ކަމަށެވެ.
ރޭ ކުރިއަށްދިޔަ ބައްދަލުވުމުގައި މިނިމަމް ވޭޖާއި ގުޅޭގޮތުން ކުދި ވިޔަފާރިކުރާ ފަރާތްތަކުގެ ކަންބޮޑުވުންތަކާއި ބޮޑެތި ވިޔަފާރިތަކުގެ ކަންބޮޑުވުންތަކުގެ އިތުރުން މަސައްކަތްތެރިންގެ ކަންބޮޑުވުންތައް އަޑުއަހާފައިވެއެވެ. އަދި މިއީ މިފަދަ ގޮތަށް މައްސަލައެއްގައި މަޖިލީހުން ފަހުގެ ތާރީހެއްގައި އާންމުންގެ ހިޔާލު ހޯދި ފަހަރުކަން ފާހަގަ ކޮށްލެވެއެވެ.
އަދި ރޭގެ ބައްދަލުވުމުގައި އިކޮނިމިކް މިނިސްޓަރުގެ އިތުރުން މަޖިލީހުގެ ބައެއް މެމްބަރުންވަނީ އާންމުންގެ ކަންބޮޑުވުންތަކަށް ޖަވާބުވެސް ދެއްވާފައެވެ.
