އެޗްޑީސީން ކުރި އިއުލާނެއްގައި ބުނީ، ހުޅުމާލޭގައި ގާއިމުކޮށްފައިވާ ރަށުމާރުކޭޓުން ގޮޅި ކުއްޔަށް ހިފުމުގެ ފުރުސަތު ހުޅުވާލެވިފައިވާ ކަމަށާއި ގޮޅި ހިންގުމަށް ކުއްޔަށް ހިފާނެ ފަރާތެއް ކަނޑައެޅިގެން ދާނީ ބީލަމުގެ އުސޫލުން، ބީލަން ހުށަހަޅާ ފަރާތްތަކުގެ ތެރެއިން އެންމެ މަތީ އަގު ހުށަހަޅާ ފަރާތްތަކަށް ކަމަށެވެ.
ގޮޅި ކުއްޔަށް ދޫކުރުމަށް ހަމަޖެހިފައިވަނީ ބީލަމުގެ އުސޫލުން ފޯމު ހުށައަޅާ ފަރާތްތަކުގެ ތެރެއިން އެންމެ މަތީ އަގު ހުށައަޅާ 23 ފަރާތަކަށް ކަމަށް އެޗްޑީސީން ބުނެއެވެ. ދެ އަހަރު ދުވަހުގެ މުއްދަތަކަށް ދޫކުރާ މި ގޮޅިތަކުގެ ބޮޑުމިނަކީ 73.33 އަކަފޫޓެވެ.
ރަށު މާރުކޭޓުން ކުއްޔަށް ދޫކުރުމަށް ނިންމާފައިވާ ގޮޅިތަކުގެ ބީލަން ފެށޭ އަގަކީ މަހަކު 3،500 ރުފިޔާ ކަމަށް އެ ކޯޕަރޭޝަނުން ބުނެއެވެ.
އެޗްޑީސީން ބުނި ގޮތުގައި ރަށުމާރުކޭޓު ގޮޅި ހިންގުމަށް އެދި ހުށަހަޅާ ބީލަން ބަލައިގަތުން އޮންނާނީ މި މަހުގެ އަށްވަނަ ދުވަހުގެ ހެނދުނު 09:30 އިން ފެށިގެން 11:00 އާ ހަމައަށް ކަމުގައެވެ. ބީލަން ބަލައިގަތުމުގެ ވަގުތު ހަމަވުމާ ހަމައަށް ދޫކުރެވިފައިވާ ނަންބަރުތަކަށް ފޯމު ބަލައިގަތުމަށް ފަހު ބީލަން ހުޅުވުން އޮންނާނެ ކަމަށް އެޗްޑީސީން ބުނެއެވެ.
އެ ކޯޕަރޭޝަނުން ބުނީ ބީލަން ހުށަހަޅަން ޖެހޭ ތަން ފަހުގެ ތާރީހެއްގައި އިއުލާނުކުރެވޭނެ ކަމަށެވެ.
ބީލަން ފޯމު ހުށަހެޅުމާ ގުޅޭ މައުލޫމާތު އެ ކޯޕަރޭޝަނުގެ ވެބްސައިޓުގައި ޝާއިއުކޮށްފައިވާ މައުލޫމާތު ކަރުދާހުގައި ހިމެނިފައިވާނެ ކަމަށާއި އިތުރު މައުލޫމާތު ސާފުކުރުމަށް އެ ކޯޕަރޭޝަނުގެ ނަންބަރު 1516 އަށް ގުޅުމަށް އެޗްޑީސީން އެދެއެވެ.
