އެމްޓީސީސީން އަންނަނީ ހަނިމާދޫގައި މަގު ހެދުމުގެ މަޝްރޫއުއެއް ކުރިއަށް ގެންދަމުންނެވެ. އެގޮތުން 46 މިލިއަން ރުފިޔާ ހަރަދުކޮށްގެން ހިންގާ މި މަޝްރޫއު ފަށާފައި ވަނީ މިދިޔަ އަހަރުގެ ޖޫން 12 ގަ އެވެ. މި މަސައްކަތުގެ 38 އިންސައްތަ މިހާތަނަށް ނިމިފައިވީ ނަމަވެސް އާޒިމް ވިދާޅުވާ ގޮތުގައި މި މަސައްކަތް އަންނަ އޮގަސްޓު މަހުގެ ތެރޭގައި ނިންމާލެވޭނެ އެވެ.
މި މަޝްރޫއުގެ ދަށުން ހަނިމާދޫގެ ހަ ކިލޯ މީޓަރުގެ 18 މަގެއްގެ މަސައްކަތް ކުރާނެ އެވެ. އަދި މި މަގުތަކުގެ ޑީޓައިލް ސާވޭކުރުމާއި ޑިޒައިން ކުރުމާއި ފެން ހިންދާ ނިޒާމު ގާއިމުކުރުމުގެ އިތުރުން ދުވާރު ހެދުމުގެ އިތުރުން މަގުތަކުގައި ތާރު އެޅުމާއި ސްޕީޑް ބްރޭކާ އަދި ރޯޑް މާކިން ވެސް ކުރާނެ އެވެ.
އޭގެ އިތުރުން ކުރިއަށް އޮތް ދިހަ ދުވަހުގެ ތެރޭގައި ހަނިމާދޫ ބަނދަރުގެ މަޝްރޫއު ފައްޓަވާނެ ކަމަށް ވެސް އާޒިމް ވިދާޅުވި އެވެ. އެގޮތުން 425 ދުވަހުގެ މުއްދަތަކަށް ހިންގާ މި ޕްރޮޖެކްޓް ނިންމޭނީ އަންނަ އަހަރުގެ ތެރޭގަ އެވެ. އެގޮތުން މި ބަނދަރުގެ މަސައްކަތް ނިމޭއިރު މި ބަނދަރު ވެގެންދާނީ ހިތްގައިމު ބަނދަރަކަށްކަން ވެސް އާޒިމް ފާހަގަކުރެއްވި އެވެ.
މަޝްރޫއުގެ ދަށުން ކުރަން ހަމަޖެހިފައިވާ ކަންކަން:
- 85097 ކިއުބިކް މީޓަރުގެ ސަރަހައްދެއް ކޮނުން.
- 355 މީޓަރު ބޭރު ތޮށި ޖެހުން
- 50 މީޓަރުގެ ހިލަ އެއްގަމު ތޮށި ޖެހުން
- 90 މީޓަރުގެ ސަރަހައްދެއްގައި ތޮށި ޖެހުން
- 2583 އަކަފޫޓުގެ ބަނދަރު ޕޭމްވަންޓް ހެދުމާއި ބަނދަރުގައި ލައިޓް ހަރުކުރުން
އޭގެ އިތުރުން ކެލާގެ ބަނދަރުގެ ދެވަނަ ފިޔަވަހީގެ މަސައްކަތް މިދިޔަ އަހަރުގެ ޖުލައި 21 އިން ފެށިގެން އެމްޓީސީސީން ކުރަމުން އަންނައިރު މި މަސައްކަތް ވެސް މި އަހަރުގެ ޖޫން 15 ގައި ނިމޭނެ ކަމަށް އާޒިމް ވިދާޅުވި އެވެ.
ކެލާގެ ބަނދަރު ހެދުމުގެ މަސައްކަތް ކުރުމުގައި ގިނަ ގޮންޖެހުންތަކެއް ކުރިމަތިވަމުން އަންނަކަން ފާހަގަކުރައްވާ އާޒިމް ވިދާޅުވީ، ކެލާއަކީ ބޮޑު ފަޅެއް އޮންނަ ރަށަކަށްވެފައި، ކޮންމެވެސް ވަރަކަށް ޑްރެޖް ކުރަމުންދާތަނަށް ވެލި އެޅި ކުރާ މަސައްކަތް ތަކުރާރުކުރަން ޖެހިފައިވާ ކަމަށެވެ. އެކަމަކު، މި މައްސަލައަށް ހައްލެއް ހޯދުމުގެ މަސައްކަތް އެމްޓީސީސީގެ އިންޖީނިއަރުންގެ ޓީމުން ކުރަމުން އަންނަ ކަމަށާއި އެގޮތުން ކުރިއަށް އޮތް ދެ މަހެއްގެ ތެެރޭގައި މިކަމަށް ހައްލެއް ލިބޭނެ ކަމަށް އުއްމީދު ކުރައްވާ ކަމަށް ވިދާޅުވި އެވެ.
މި މަސައްކަތް ވެސް އަންނަ ޖޫން މަހުގެ ތެރޭގައި ނިންމުމަށް އެމްޓީސީސީން އަޒުމް ހިފާފައި ހުރިއިރު މި މަޝްރޫއުގެ ދަށުން 16264 ކިއުބިކް މީޓަރުގެ ސަރަހައްދެއް ކޮންނާނެ އެވެ. އަދި 31 މީޓަރުގެ ބޭރު ތޮއްޓެއް ޖެހުމާއި ގޮނޑުދޮށް ހިމާޔަތްކުރުމަށް 220 މީޓަރުގެ ސަރަހައްދެއްގައި ތޮށި ޖަހާނެ އެވެ. އޭގެ އިތުރުން، 50 މީޓަރު ބަނދަރު އެއްގަމު ތޮށި ޖެހުމާއި 1445 އަކަފޫޓުގެ ޕޭވްމަންޓެއް ހެދުމާއި ބަނދަރުގައި ލައިޓް ހަރުކުރުން ވެސް މި މަޝްރޫއުގެ ތެރޭގައި ހިމެނެ އެވެ.
އެ މަސައްކަތްތަކުގެ އިތުރުން ހޯރަފުށީ، އެއާޕޯޓް ޑިވެލޮޕްމަންޓް އަދި ލޭންޑް ރިކްލަމޭޝަން އެންޑް ޝޯ ޕްރޮޓެކްޝަން މަސައްކަތް ވެސް ކުރަމުން ދަނީ އެމްޓީސީސީންނެވެ. އެގޮތުން 198 މިިލިއަން ރުފިޔާގެ މި މަޝްރޫއުއަކީ 17 މަސް ދުވަހުގެ ތެރޭގައި ނިންމަން ޖެހޭ މަސައްކަތެކެވެ.
މިހާރު މި މަސައްކަތުގެ 52 އިންސައްތަ ނިމިފައި ވާއިރު އެމްޓީސީސީން ލަފާކުރާ ގޮތުގައި އަންނަ ސެޕްޓެމްބަރު މަހަށް މި މަސައްކަތް ނިމޭނެ އެވެ.
މަޝްރޫއުގެ ދަށުން ކުރާނެ މަސައްކަތް:
- 842200.33 ކިއުބިކް މީޓަރުގެ ކޮނުމާއި ބިން ހިއްކުން
- ގޮނޑުދޮށް ހިމާޔަތްކުރުމަށް 1120 މީޓަރުގެ ރިވެޓްމަންޓް ޖެހުން
- އޭޕްރަން އަދި ޓެކްސީވޭ، 8635 އަކަމީޓަރު
- ސާވިސް ރޯޑް އަދި ފަޔާ އެކްސެސް ރޯޑް ހެދުން
އޭގެ އިތުރުން ހޯރަފުށީ އެއާޕޯޓްގައި 1.2 ކިލޯމީޓަރުގެ ރަންވޭ އެއް ހެދުމުގެ މަސައްކަތް ވެސް މިހާރު ކުރެވެމުންދާއިރު ގަސް އިންދަައި އެ ސަރަހައްދު ފެހި ކުރުމުގެ މަސައްކަތް ވެސް ވަރަށް ބާރަށް ކުރިއަށްދާ ކަމަށް އާޒިމް ވިދާޅުވި އެވެ.
