މި ހަތަރު މަޝްރޫއުގެ މަސައްކަތް އެމްޓީސީސީ އާ ހަވާލުކުރުމަށް ޕްލޭނިން މިނިސްޓްރީގައި ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޗީފް އެގްޒެކެޓިވް އޮފިސަ އާދަމް އާޒިމެވެ. ޕްލޭނިން މިނިސްޓްރީގެ ފަރާތުން ސޮއިކުރެއްވީ ޑިރެކްޓަ ޖެނެރަލް ފާތުމަތު ޝާނާ ފާރޫގެވެ.
ކ. ހިންމަފުށި ގިރާ ސަރަހައްދު ހިމާޔަތްކުރުމުގެ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- 160 މީޓަރުގެ ބޮޑުހިލަ ރިވެޓްމަންޓެއް ޖެހުން
- 53 މީޓަރުގެ ބޮޑުހިލަ ގްރޮއިން ޖެހުން
- 127 މީޓަރުގެ ބޮޑުހިލަ ބޭރުތޮށިލުން
މި މަޝްރޫއުގެ ދަށުން އެ ރަށުގައި ފާހަގަކުރެވިފައިވާ ލަފާ ފުރުމުގެ ދަތިކަމުގެ މައްސަލަ ހައްލުކުރުމަށްޓަކައި ރަށުގެ ބަނދަރު ބޮޑުކުރެވި އަދި ރަށުގެ އުޅަނދުތައް އެހެލުމަށްޓަކައި ބޯޓުބީޗިން އޭރިއާއެއް ހެދިގެންދާނެއެެވެ.
ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީ އާ ހަވާލުކޮށްފައިވަނީ 11.8 މިލިއަން ރުފިޔާ އަށް 180 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
ހދ.ކުޅުދުއްފުށި ޖެޓީ އެކްސްޓެންޝަން މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- ރަށުގެ ބަނދަރުގައި ގާއިމުކޮށްފައިވާ ލަކުޑި ހަތް ޖެޓީއެއް އިތުރު ހަތަރު މީޓަރަށް ދިގުކުރުން
- ޖެޓީތައް ދެމެދު ލަކުޑި ޕްލެޓްފޯމް ގާއިމުކުރުން
- ސެޕްރޭޝަން ވޯލްގެ ބައެއް ވަރުގަދަކުރުން
- މިހާރު ގާއިމުކޮށްފައިވާ ފްލޯޓިން ޕްލެޓްފޯމްތަކުގެ ޕައިލްތައް 0.75 މީޓަރަށް ދިގުކުރުން
މި މަޝްރޫއުގެ ދަށުން އެ ރަށުގައި ގާއިމުކޮށްފައިވާ ލަކުޑި ޖެޓީތައް ދިގުކުރުމާއި ބަނދަރު ތެރޭގައި ގާއިމުކޮށްފައިވާ ސެޕްރޭޝަން ވޯލް އަދި ފްލޯޓިން ޕްލެޓްފޯމްތަކުގައި ފާހަގަކޮށްފައިވާ މައްސަލަަތައް ހައްލުކުރެވިގެންދާނެއެެވެ.
ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީ އާ ހަވާލުކޮށްފައިވަނީ 13 މިލިއަން ރުފިޔާ އަށް 250 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
ނ.ކެނދިކުޅުދޫ ބަނދަރު ތަރައްގީކުރުމުގެ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- ރަށުގެ ހުޅަނގު ފަރާތު ބަނދަރުގެ އުތުރުން ބަނދަރު ބޮޑުކުރުން
- ބަނދަރު ނެރުފައިކަށި ދިގުކުުރުމަށް 168 މީޓަރުގެ ބޮޑުހިލަ ބޭރުތޮށިލުން
- ބަނދަރު ބޮޑުކުރާ ބައިގެ 200 މީޓަރު ބޮޑުހިލަ ބޭރުތޮށިލުން
- ބެކްފިލް ކުރާ ބައިގެ 130 މީޓަރުގެ ރިވެޓްމަންޓް ޖެހުން
- 246 މީޓަރު ބޮޑުހިލަ ގްރޮއިން ޖެހުން
- 249 މީޓަރުގެ ކީވޯލް
- 86 މީޓަރުގެ ޖެޓީ
މި މަޝްރޫއުގެ ދަށުން އެ ރަށުގައި ފާހަގަކުރެވިފައިވާ ލަފާ ފުރުމުގެ ދަތިކަމުގެ މައްސަލަ ހައްލުކުރުމަށްޓަކައި ރަށުގެ ބަނދަރު ބޮޑުކުރެވި އަދި ރަށުގެ އުޅަނދުތައް އެހެލުމަށްޓަކައި ބޯޓުބީޗިން އޭރިއާއެއް ހެދިގެންދާނެއެވެ.
ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީ އާ ހަވާލުކޮށްފައިވަނީ 79 މިލިއަން ރުފިޔާ އަށް 500 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
އއ. މަތިވެރި ގޮނޑުދޮށް ސަރަހައްދު ހިމާޔަތްކުރުމުގެ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- ރަށުގެ ހުޅަނގު ފަރާތުގައި 54 މީޓަރުގެ ބޮޑުހިލަ ރިވެޓްމަންޓް ޖެހުން
- 63 މީޓަރު ބޮޑުހިލަ ގްރޮއިން ޖެހުން
- ދެކުނު ފަރާތުގައި 70 މީޓަރުގެ ފަސް ވައިގްރޮއިން ޖެހުން
- އިރުމަތީ ފަރާތުގައި 110 މީޓަރުގެ ބޮޑުހިލަ ބޭރުތޮށިލުން
- 70 މީޓަރުގެ ވައިގްރޮއިން ޖެހުން
- އިރުމަތީ ފަރާތް ފަސް މީޓަރު ފުޅާމިނަށް ގޮނޑުދޮށް ވެލިއެޅުން
މި މަޝްރޫއުގެ ދަށުން އެ ރަށުގައި ފާހަގަކުރެވިފައިވާ ރަށް ގިރުމުގެ މައްސަލަ ހައްލުކުރުމަށްޓަކައި ރަށުގެ ގޮނޑުދޮށް ހިމާޔަތް ކުރެވިގެންދާނެއެވެ.
ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީ އާ ހަވާލުކޮށްފައިވަނީ 24.8 މިލިއަން ރުފިޔާ އަށް 240 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
