ވ. އާރަށް މައްސަލާގައި، ރައީސް ޔާމީން 53 މިލިއަން ރުފިޔާ ދައްކަން ކްރިމިނަލް ކޯޓުން ކުރި އަމުރު ނެރުނީ ގާނޫނާ ހިލާފަށް ކަމަށާއި އެ އަމުރު ބާތިލުކޮށްދޭން ޔާމީންގެ ފަރާތުން ހައިކޯޓުގައި އެދުނީ ހައިކޯޓުގައި މިއަދު އޮތް އެ މައްސަލައިގެ އިސްތިއުނާފުގެ ފުރަތަމަ އަޑު އެހުމުގައެވެ.
އާރަށު މައްސަލާގައި ދައުލަތުން، ޔާމީންގެ ފަރާތުން އަނބުރާ ހޯދުމަށް އެދިފައިވަނީ ލޯންޑާކުރި ކަމަށް ތުހުމަތުކުރާ އެއް މިލިއަން ޑޮލަރާއި އެ ފައިސާ އިންވެސްޓްކޮށްގެން ޔާމީނަށް ލިބުނު ފައިދާ އެވެ. މިގޮތަށް ދައުލަތުން އެދިފައިވަނީ މަނީލޯންޑަރިން އާއި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުންނެވެ. އެ މައްސަލައިގައި ރިޝްވަތު ހިފުމާއި މަނީލޯންޑަރިންގެ ކުށް ސާބިތުވެ ޔާމީންގެ މައްޗަށް ކުރީ 11 އަހަރުގެ ޖަލު ހުކުމެކެވެ. އެ ހުކުމް ޔާމީންގެ މައްޗަށް އިއްވީ މިދިޔަ ޑިސެމްބަރު 25، 2022 ގަ އެވެ. ނަމަވެސް 53 މިލިއަން ހަ މަސް ތެރޭ ދެއްކުމަށް ކްރިމިނަލް ކޯޓުން އަމުރުކުރީ މިދިޔަ ފެބްރުއަރީ 26، ގަ އެވެ.
ހައި ކޯޓުގައި ޔާމީންގެ ވަކީލު އަބްދުﷲ ޝިޔާޒު ވިދާޅުވީ ޖިނާއީ ކުށެއް ސާބިތުވެފައިވާ ހާލުގައި ދައުލަތަށް މުދަލާއި ފައިސާއެއް ނަގާނަމަ އެ ކަމެއް ހިމަނަން ޖެހޭނީ މައްސަލައިގެ ހުކުމުގައި ކަމަށެވެ. ޝިޔާޒު ފާހަގަ ކުރެއްވީ އެ ގާނޫނުގައި ހުކުމުގައި ފާހަގަކުރަން ޖެހޭ ކަންކަން ބަޔާންކުރާ މާއްދާގައި މުދަލާއި ފައިސާއެއް ދައުލަތަށް ނަގާނަމަ އެ ކަމެއް ހިމަނަން ބަޔާން ކޮށްފައި އޮތުމުން އެނގެނީ ވެސް އެއީ ހުކުމް ކުރާ އިރު އޮންނަން ވާނެ އަމުރެއް ކަން ކަމަށެވެ.
ޔާމީންގެ ލީގަލް ޓީމުގެ ވާހަކައިގެ ރައްދުގައި ދައުލަތުން ބުނީ މައުލޫއީ މައްސަލައިގެ ހުކުމަށް ފަހުން އޭގައި ހިމެނޭ މުދަލާއި ފައިސާ ނަގަން އަމުރެއް ނެރުމުގައި ގާނޫނީ ހުރަހެއް ނެތް ކަމަށެވެ. އަދި މީގެ ސަބަބުން މައުލޫއީ މައްސަލައިގެ ހުކުމަށް އެއްވެސް އަސަރެއް ވެސް ނުކުރާނެ ކަމަށް ދައުލަތުގެ ޕްރޮސިކިއުޓަރުން ބުންޏެވެ.
ހައިކޯޓުގެ މިއަދުގެ ޝަރީއަތް ނިންމާލީ މި މައްސަލައިގެ އިތުރު އަޑު އެހުމެއް ބާއްވާނެ ކަން އިއުލާން ކުރަމުންނެވެ.
