އިއްޔެ ރެއާލް ވަޔަޑޮލިޑް އަތުން 6-0 އިން ރެއާލް މެޑްރިޑް މޮޅުވި މެޗުގައި އެ ޓީމުގެ ފްރާންސް ފޯވާޑް ކަރީމް ބެންޒެމާ ހެޓްރިކް ހެދީ 29، 32 އަދި 36 ވަނަ މިނިޓުގައި ޖެހި ލަނޑުތަކުންނެވެ. އިއްޔެގެ މި ނަތީޖާއާއެކު ރިއާލްއަށްވަނީ، 59 ޕޮއިންޓް ލިބިފައެވެ. އެކަމަކު އެ ޓީމު އޮތީ އެއްވަނައިގަ އޮތް ބާސެލޯނާއަށް ވުރެ 12 ޕޮއިންޓް ފަހަތުގައެވެ. ބާސާ އެއްވަނައިގަ އޮތީ 71 ޕޮއިންޓާއެކުއެވެ.
ލީގުގައި ރިއާލަށް އޮތީ ބާކީ 11 މެޗެވެ. މި 11 މެޗުން، 12 ޕޮއިންޓުގެ ފަރަގު ނައްތާލައި ރެއާލަށް ލީގު ކާމިޔާބުކުރެވުމުގެ ފުރުސަތު ކުޑަ އެވެ. އެހެންކަމުން ރެއާލުގެ މިހާރުގެ ޓާގެޓަކަށް ހަދާފައިވަނީ ޗެމްޕިއަންސް ލީގާއި ސްޕެނިޝް ކަޕެވެ. މީގެ ތެރެއިން ސްޕެނިޝް ކަޕުގެ ސެމީ ފައިނަލުގެ ދެ ވަނަ ލެގުގައި ބުދަ ދުވަހުގެރޭ ވާދަވެރި ބާސެލޯނާއާ ދެކޮޅަށް ރެއާލް ނުކުންނާނެ އެވެ. އަދި ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި އިންގްލެންޑުގެ ޗެލްސީއާ ދެކޮޅަށް އަންނަ ހަފުތާގައި ނުކުންނާނެ އެވެ.
ރޯދައަށް ހުރެ ބެންޒެމާ ހެދި ހެޓްރިކް މިއީ މިއީ 1992 ވަނަ އަހަރު ކުޅުނު ލީގު މެޗެއްގައި ރެއާލްގެ ލެޖެންޑް ފެނާންޑޯ ހިއޭރޯ ހަ މިނިޓުގެ ތެރޭގައި ހެޓްރިކެއް ހެދި ފަހުން، ލަ ލީގާގެ މެޗެއްގައި ރެއާލްގެ ކުޅުންތެރިއެއް އެންމެ އަވަހަށް ހެދި ހެޓްރިކެވެ.
