ކެއާ ސޮސައިޓީން ބުނީ އެ ސޮސައިޓީން ދެމުން ގެންދާ ހިދުމަތްތައް ފުޅާކުރުމުގެ ގޮތުން ހުޅުމާލެ ދެވަނަ ފިޔަވަހީގެ ހިޔާ ފުލެޓް ސަރަހައްދުގައި އާބަންކޯ އާ ގުޅިގެން ތެރަޕީ، ރިހެބިލިޓޭޝަން އާއި އިންޓަވެންޝަން ހިދުމަތަށް އަމާޒުކޮށްގެން 'ހިޔާ އެނެކްސް' ގެ ނަމުގައި ސެންޓަރެއް ގާއިމްކުރުމުގެ މަސައްކަތް ފަށާފައިވާ ކަމަށެވެ.
މި ސެންޓަރުގެ އަމަލީ މަސައްކަތުގެ އެއްބަސްވުމުގައި މިއަދު ސޮއިކޮށްފައިވާ ކަމަށާއި މި ސެންޓަރުގެ މަސައްކަތް ތާވަލާ އެއްގޮތަށް ދާނަމަ އަންނަ ޖޫންމަހުގެ ފަހުކޮޅު ނިންމާ ހިދުމަތަށް ހުޅުވާލެވޭވަރު ވާނެކަމަށް އެ ސޮސައިޓީން ބުނެއެވެ.
ކެއާ ސޮސައިޓީން ބުނެފައިވަނީ އެ ސޮސައިޓީން މަސައްކަތް ކުރަމުން ދަނީ އެންމެ ލަސްވެގެން އަންނަ އޮގަސްޓް މަހު މި ސެންޓަރުން ހިދުމަތް ފެށުމަށް ކަމަށެެވެ.
މައިގަނޑު ގޮތެއްގައި މި ސެންޓަރުން ދެވޭނެ ހިދުމަތްތަކުގެ ތެރޭގައި:
- ކުދިންގެ ޅަފަތުގައި އެކިއެކި ހުނަރުތައް ތަރައްގީކުރުމަށް އާލީ އައިޑެންޓިފިކޭޝަން އަދި އާލީ އިންޓަވެންޝަން ފޯރުކޮށްދިނުން. މިއީ މައިގަނޑު ގޮތެއްގައި ހަ އަހަރުން ދަށުގެ ކުދިންނަށް އަމާޒުކޮށްގެން ހިންގޭ ޕްރޮގްރާމް.
- ވޮކޭޝަނަލް ޕްރޮގްރާމް - މިއީ ސްކޫލް ނިންމާ އުމުރުގެ ކުދިންނަށް މަސައްކަތްތެރިކަން ދަސްކޮށްދިނުމުގެ ގޮތުން ހިންގޭ ޕްރޮގްރާމެއް. މި ޕްރޮގްރާމުގެ އަމާޒަކީ ސްކޫލް ނިންމާ ކުދިންނަށް އާމްދަނީ ހޯދޭނެ ގޮތެއް ނުވަތަ ވަޒީފާއަށް ނެރުމަށް ތައްޔާރުކޮށްދިނުން.
- ތެރަޕީ ޕްރޮގްރާމް - މިއީ ޅަފަތުގެ އުމުރު ފުރާގަޔާ އަދި ކުދިންނަށް ބޭނުންވާ އިތުރު އެހީގެ ތެރެއިން ހާއްސަކޮށް އެކިއެކި ތެރަޕީ ބޭނުންވާ ކުދިންނަށް ފޯރުކޮށްދޭ ހިދުމަތް.
- ސަބްޖެކްޓް ކޯޗިން - މިއީ ސްކޫލަށް ގަވާއިދުން ދެވޭ ކުދިންނަށް އެހެންނަމަވެސް ކުއްޖާގެ ހުރި އުނގެނުމުގެ އެކި ދަތިކަމަކާ ހެދި އިތުރު އެހީ ބޭނުންވާ ކުދިންނަށް ވަކިވަކި މާއްދާތަކުން އެހީތެރިކަންދިނުމުގެ ގޮތުން މުޅިން އަލަށް ހިންގަން ރާވާފައިވާ ޕްރޮގްރާމް.
