އައު ހުނަރުތައް ތަރައްގީކުރުމާއި، ވަކި މަސައްކަތުގެ ދާއިރާތަކުން ހާއްސަވުމަށް އެދޭ ފަރާތްތަކަށް ތައުލީމޖުގެ އިތުރަށް މަސައްކަތު މާހައުލުން ތަމްރީން ހޯދައިދިނުމުގެ އަމާޒުގައި، އަރބަންކޯއިން ކުރިއަށްގެންދާ އެޕްރެންޓިސްޝިޕް ޕްރޮގްރާމުގައި ޖުމްލަ ހަ ދާއިރާއަކުން މި އަހަރު ފުރުސަތު ހުޅުވާލެވިފައިވާއިރު، ޖުމްލަ 100 ބައިވެރިންނަށް މި ޕްރޮގްރާމުގައި ބައިވެރިވެވޭނެއެވެ. އެއީ އާންމުންގެ ތެރެއިން 82 ފަރާތާއި އަރބަންކޯގެ މުވައްޒަފުންނަށް ޚާއްސަކުރެވިފައިވާ 18 ޖާގައެވެ.
މިއަހަރުގެ އެޕްރެންޓިސްޝިޕް ޕްރޮގްރާމް ކުރިއަށްގެންދާ ތަކަކީ:
- ފިޝަރީޒް އެންޑް އެގްރިކަލްޗަރު
- ސޯޝަލް ސެކްޓަރު
- އައިސީޓީ
- ޓްރާންސްޕޯޓް ސެކްޓަރު
- ޓުއަރިޒަމް ސެކްޓަރު
- ކޮންސްޓްރަކްޝަން ސެކްޓަރު
އާބަންކޯގެ އެޕްރެންޓިސްޝިޕް ޕްރޮގްރާމްގެ ބައިވެރިއެއް
އާބަންކޯއިން މައުލޫމާތު ދޭގޮތުގައި މި ހަ ދާއިރާގެ ދަށުން، ތަފާތު އެކި ޓެކްނިކަލް މަސައްކަތްތައް ދަސްކޮށްދޭ ޕްރޮގްރާމްތައް ހިމެނިފައިވާނެކަމަށާއި، އޭގެ ތެރޭގައި ޖުމްލަ 12 މަސައްކަތް ހިމެނިގެންދާއިރު، ދަނޑުވެރިކަމާއި، ކޮމްޕިއުޓަރު ހާޑްވެއާ ހެވީ ވެހިކަލް އޮޕަރޭޝަންސް، އަދި ވެލްޑިންއާއި ކޮންސްޓްރަކްޝަން ސައިޓް ސުޕަވައިޒިން ފަދަ އާންމުކޮށް ދިވެހިން ނުފެންނަ މަސައްކަތްތަކުން ތަމްރީން ހޯދުމުގެ ފުރުސަތު ލިބިގެންދާނެކަމަށްވެސް އާބަންކޯ އިން މައުލޫމާތުދެއެވެ.
އާބަންކޯގެ އެޕްރެންޓިސްޝިޕް ޕްރޮގްރާމްގެ ބައިވެރިންތަކެއް
މީގެއިތުރުން، މިއެޕްރެންޓިސްޝިޕް ޕްރޮގްރާމުގައި މި ދާއިރާތަކުން ތައުލީމުގެ އިތުރަށް ވަޒީފާގެ ތަޖުރިބާވެސް ލިބިގެންދާނެކަމަށާއި، 6 މަސްދުވަހުގެ މުއްދަތަކަށް ކުރިއަށްގެންދާ މި ޕްރޮގްރާމުގައި ބައިވެރިވާ ފަރާތްތަކަށް އެ މުއްދަތުގެ ތެރޭގައި ހާއްސަ އެލަވަންސެއްގެ ގޮތުން ކޮންމެ ބައިވެރިއަކަށް 6،000 ރުފިޔާ ލިބިގެންދާނެ ކަމަށާއި އަދި ޕްރޮގްރާމް ނިމުމާއެކު ހޮވާލެވޭ ބައިވެރިންތަކަކަށް އާބަންކޯގައި ވަޒީފާއަދާކުރުމުގެ ފުރުސަތު ލިބިގެންދާނެ ކަމަށްވެސް އާބަންކޯ އިން މައުލޫމާތު ދެއެވެ.
މި ޕްރޮގްރާމުގައި ބައިވެރިވާން އެދޭ ފަރާތްތަކަށް މި ހަފްތާގެ އާދިއްތަ ދުވަހުން ފެށިގެން މި އަންނަ މެއި މަހުގެ 14 ވަނަ ދުވަހުގެ ނިޔަލަށް ވަނީ ފުރުސަތު ހުޅުވާލެވިފައެވެ.
