އެތެރޭގެ އުދުހުންތަކުގެ އަގުތައް އުފުލެމުންދާ މައްސަލަ، ރައްޔިތުންގެ މަޖިލީހުގެ އެސްއޯއީ ކޮމިޓީއަށް ހުށަހެޅުމުން، އެމައްސަލައިގައި ސުވާލުކުރުމަށް އައިލޭންޑް އޭވިއޭޝަންގެ ވެރިން ހާޒިރުކުރުމުން، އެކޮމިޓީގައި މިއަދު ވާހަކަދައްކަވަމުން މިހާދު ވިދާޅުވީ، ސަރުކާރުގެ ސިޔާސަތާއެއްގޮތްވާ ގޮތުގެ މަތީން 2019 ވަނައަހަރު އެތެރޭގެ އުދުހުންތަކުން ކޮންމެ ޓިކެޓަކުން 300 ރުފިޔާ ދަށްކުރެވިފައިވާނެކަމަށެވެ.
އެހެންކަމާއެކު، ސަރުކާރުން އެއަހަރު ސަބްސިޑީގެ ގޮތުގައި 35 މިލިއަން ރުފިޔާ ދިންކަމަށާއި، އެހެންނަމަވެސް އޭގެފަހުން ސަބްސިޑީ ލިބިފައިނުވާކަމަށްވެސް މިހާދު ވިދާޅުވިއެވެ.
ޖެޓްފިއުލްގެ އަގު ބޮޑުވުމަކީވެސް ދަތުރުތަކަށް ވިއްކާ ޓިކެޓްއަގު ބޮޑުކުރަންޖެހުނު އެއްސަބަބު ކަމަށް ވިދާޅުވެ، މިހާދު ވިދާޅުވީ، ޖެޓްފިއުލްގެ އަގުބޮޑުވުމާއި ގުޅިގެން ދެފަހަރަކަށް މޯލްޑިވިއަން އިންވިއްކާ ޓިކެޓްތަކުގެ އަގުބޮޑުކުރެވިފައިވާނެކަމަށެވެ.
މީގެއިތުރުން، އައިލެންޑް އޭވިއޭޝަން އުފެދިގެން އައިއިރު ރާއްޖޭގެ ޑޮމެސްޓިކް އެއަޕޯޓްތަކުގެ ގްރައުންޑް ހޭންޑިލްގް އެކުންފުންޏަށް ލިބިފައިއޮތަސް، ފަހުން އެކުންފުނީގެ އަތުން ގްރައުންޑް ހޭންޑްލިންގް އަތުލާފައިވާ ކަމަށާއި، އެއީވެސް ކުންފުންޏަށް ލިބުނު ގެއްލުމެއް ކަމަށްވެސް މިހާދު ވިދާޅުވިއެވެ.
މީގެއިތުރުން، ގައުމީ އެއަލައިން ކަމަށްވާތީވެ، ކަނެކްޓިވިިޓީ ދަމަހައްޓަން އަލަށް ހުޅުވުނު ހުރިހާ އެއަރޕޯޓަކަށްވެސް ދަތުރުކުރަންޖެހޭ ކަމަށާއި، މިދަތުރުތަކުގައި، ދަތުރެއް ފުރިހަމަކުރަން ލިބެނެހޭ ލޯޑް ނުލިބުނަސް އެދަތުރު ކުރަމުންދާތީވެ، ކުންފުންޏަށް ގެއްލުންވަމުން އަންނަ ކަމަށާއި، މިގެއްލުންތަކުން އަރައިގަންނަން ކޮންމެހެން ގެންނަންޖެހޭ ބަދަލެއް ނޫނީ ޓިކެޓްގެ އަގުތަކަށް ނުގެންނަކަމަށްވެސް މިހާދު ވިދާޅުވިއެވެ.
