މިވަގުތު އަދި ނުރައްކާތެރި ހާލަތަކަށް އަދި ގޮސްފައި ނުވި ނަމަވެސް ދުވަހަކަށް ވުރެ ދުވަހެއް ކޮވިޑް ކޭސްތައް ގިނަ ވަމުން ދާ ކަމުގައި އެޗްޕީއޭ އިން ސީއެންއެމްއަށް ދިން އެކްސްކުލޫސިވް އިންޓަވިއުގައި ބުންޏެވެ.
އެޗްޕީއޭއިން ބުނީ މިހާރު އޮތް ހާލަތަށް ބަދަލު އައިސް ކޭސްތައް އިތުރު ވަމުންދާ ނަމަ ފިޔަވަޅުތައް އިތުރު ކުރަން ޖެހިދާނެ ކަމަށެވެ.
އަދި އެފަދަ ގޮތަކަށް ކަމެއް ކުރަން ޖެހިއްޖެ ހާލަތެއްގައި އާއްމުންނާއި އެކަން ހިއްސާ ކުރައްވަމުން ގެންދަވާނެ ކަމަށްވެސް އެޗްޕީއޭއިން ސީއެންއެމްއާ ވާހަކަ ދައްކަމުން ބުންޏެވެ.
އާބާދީ ގެ ބޮޑު އިންސައްތައަކީ ކޮވިޑް ވެކްސިންގެ ފުރަތަމަ އަދި ދެވަނަ ޑޯޒް ފުރިހަމަ ކޮށްފައިވާ ފަރާތްތައް ކަމަށް ވީނަމަވެސް، ބޫސްޓަރ ޑޯޒްތައް ހަމަ ކުރައްވާ ފައިވާ ފަރާތްތައް މަދުކަމަށް އެޗްޕީއޭގެ ޕަބްލިކް ހެލްތު ޕްރޮގްރާމް އޮފިސާ މަފާޒާ އަހްމަދު ފާހަގަ ކުރެއްވި އެވެ.
އިތުރު މައުލޫމާތު ދެއްވަމުން އެޗްޕީއޭގެ ސީނިއާ ޕަބްލިކް ހެލްތު ޕްރޮގްރާމް އޮފިސަ ފާތިމަތު ފައުޒާ އިބްރާހީމް ވިދާޅުވީ މީސްލްސް ކޭސްތައް ދޭތެރޭ ދޭތެރެއިން ފެންނަމުން ދާކަމަށާއި އެއީ ރާއްޖެއިން ބޭރުން އިމްޕޯޓްވާ ކޭސްތަކެއް ކަމަށެވެ.
ކޮވިޑާއި މީސްލްސް އިން ރައްކާތެރި ވުމަށް ވެކްސިން ޑޯޒްތައް ފުރިހަމަ ކުރުމަށާއި ގިނައިން އަތް ދޮވެ މާސްކް އެޅުމަށް އެޗްޕީއޭ އިން އިލްތިމާސް ކުރެއެވެ.
