ހިޔާ ފްލެޓުގެ އަގު ސަރުކާރުގެ ފަރާތުން ކުޑަކޮށްފައިވާކަމަށް ދެކެވެމުން އަންނަ ވާހަކަތަކާ ގުޅިގެން ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން ރައީސް ސޯލިހު ވިދާޅުވީ، ހިޔާ ފްލެޓުތަކުގެ އަގު ކުޑަކުރުމަށް މަޝްވަރާތައް ކުރައްވަމުން ގެންދަވާތާ ދުވަސްތަކެއްވެފައިވާ ކަމަށެވެ.
ރައީސް ވިދާޅުވެފައިވަނީ ހިޔާ ފްލެޓަށް ކޮށްފައިވާ އިންވެސްޓްމަންޓަށް ގެއްލުން ނުވާނެ ގޮތަށާއި އެކަމުން ސަރުކާރަށްވެސް ގެއްލުން ނުވާނެ ގޮތަކަށް ބަދަލުތައް ގެނައުމަށް ނިންމަވާފައިވާ ކަމަށެވެ.
ރައީސް ސޯލިހު ވިދާޅުވި ގޮތުގައި ހިޔާ ފްލެޓުތަކުގެ އަގަށް ގެންނަ ހެޔޮ ބަދަލު އަދި އާންމުކުރައްވާފައި ނުވާނެ ކަމަށާއި އެކަން ވަރަށް އަވަހަށް ހާމަކުރައްވާނެ ކަމުގައެވެ.
"މާނައަކީ އެތަނަށް، ހިޔާ ފްލެޓަށް ކުރި ހަރަދަށް ބަދަލުވަނީއެއް ނޫނޭ. ހަރަދު 25 އަހަރަށް އިތުރުކުރީމަ އަންނަ އަދަދު ކުޑަކުރެވޭތޯ، އަދިވެސް ކުޑަކުރެވޭނެ ގޮތް ހުންނާނެ. އަޅުގަނޑުމެންނަށް މަޝްވަރާކޮށް ހޯދުނު ފޯމިއުލާއެއް އެއީ. އެ އަގު ވަރަށް އަވަހަށް ހާމަކުރެވޭނެ،" ރައީސް ވިދާޅުވިއެވެ.
ހިޔާ ފްލެޓުތަކުގެ އަގަށް ބަދަލު ގެންނަވާނެ ކަމަށް ރައީސް ވިދާޅުވެފައިވާއިރު، ސަރުކާރުގެ ކަމާ ގުޅުންހުރި މުއައްސަސާތަކާއި އާބަންކޯ އާއެކު ކުރެވުނު މަޝްވަރާތަކަކަށް ފަހު ހިޔާގެ ކުލި 5،300 ރުފިޔާއަށް ކުޑަކުރުމަށް ނިންމާފައިވާ ކަމަށް ރާއްޖޭގެ ބައެއް މީޑިއާތަކުގައި ވަނީ ރިޕޯޓުކޮށްފައެވެ.
ހިޔާ ފްލެޓުތަކުގެ ކުލި ކުޑަކޮށްފައިވަނީ އެތަންތަނުގައި ދިރިއުޅެވޭވަރު ކުރުމަށްޓަކައި ފްލެޓް ލިބުނު ފަރާތްތަކުން ބޮޑު ހޭދައެއް ކޮށްފައިވުމުގެ އިތުރުން ތަން ހެދުމަށް ބައެއް ފަރާތްތަކުން ހަރަދު ކޮށްފައިވަނީ ދަރަންޏަށް ނުވަތަ ލޯނު ނަގައިގެން ކަމަށް ވާތީ އެކަމަށް ލުއި ދިނުމުގެ ގޮތުން ކަމަށް މައުލޫމާތު ލިބެއެވެ.
އުތުރު ހުޅުމާލޭގައި ހަދާފައިވާ 25 ބުރީގެ 16 ޓަވަރުގެ ފްލެޓުތަކުގެ ކުއްޔަކީ މަހަކަށް 7،500 ރުފިޔާއެވެ. މެއިންޓެނެންސް ފީގެ ގޮތުގައި ދައްކާ 1،000 ރުފިޔާ އާއެކު ޖުމްލަ 8،500 ރުފިޔާ ފްލެޓުތަކުގައި އުޅޭ ފަރާތްތަކުން ކޮންމެ މަހަކު ކުލީގެ ގޮތުގައި ދަނީ ދައްކަމުންނެވެ.
ހިޔާގެ ކުލި ކުޑަކުރުމަށް ނިންމާފައިވަނީ، އެ ފްލެޓުތަކަށް ފައިސާ ދައްކާ ހަލާސްކުރުމަށް މިހާރު ކަނޑައަޅާފައިވާ މުއްދަތަށް ހަތް އަހަރު އިތުރު ކޮށްގެންނެވެ. ފްލެޓުތަކަށް މިހާރު ފައިސާ ދައްކާ ހަލާސް ކުރަން ޖެހެނީ 25 އަހަރު ދުވަހުގެ ތެރޭގައި ކަމަށް ވީ ނަމަވެސް، މި ބަދަލާ އެކު ފައިސާ ދައްކާ ހަލާސް ކުރަން ޖެހޭ މުއްދަތު 32 އަހަރަށް ދިގު ދެމިގެންދާނެއެވެ. ފްލެޓުތަކުގެ ކުއްޔަށް ގެންނަ މި ބަދަލާ އެކު މިހާރު ދައްކަމުން އަންނަ ކުލިން 2،200 ރުފިޔާ އުނިވާނެއެވެ.
