މިހާދިސާ ހިނގާފައިވަނީ މި މަހުގެ ފަސް ވަނަ ދުވަހު މެލޭޝިޔާގެ ސަބާހުގެ ސެމްޕޯނާ ކަނޑުގެ ކަނޑުގެ ސަރަހައްދުގައި އެ ދެމީހުން ޑައިވިންގް ކުރަމުން ދަނިކޮށެވެ. އުމުރުން 24 އަހަރުގެ ޗައިނާގެ ފަތުރުވެރިޔާ ފުލުހުންނަށް ކިޔައިދިން ގޮތުގައި 27 އަހަރުގެ ޑައިވިން އިންސްޓްރަކްޓަރު އޭނާގެ ކޯތާފަތުގައި ބޮސްދިނީ އެމީހުން ކަނޑު އަޑީގައި ތިއްބައެވެ.
ފަތުރުވެރިޔާ ބުނީ އެ ހާދިސާއާ ގުޅިގެން ސިހުމާއި ބިރުގަތްކަމަށެވެ. އަދި ފަތާފައި އިންސްޓްރަކްޓަރާ ދުރަށް ދިޔަކަމަށެވެ. ކަނޑުން އަރައި އެ މައްސަލަ ވަނީ ފުލުހުންނަށް ރިޕޯޓުކޮށްފައެވެ.
ފުލުހުން ވަނީ ޑައިވިން އިންސްޓްރަކްޓަރު ހައްޔަރުކޮށް، ގާނޫނުލް އުގޫބާތުގެ 354 ވަނަ މާއްދާގެ ދަށުން ބާރުގެ ބޭނުން ކޮށްގެން އަންހެނެއްގެ ހައްގުވެރިކަމަށް އަރައިގަތް މަސްސަލަ ތަހުގީގުކުރަން ފަށާފައެވެ.
އިންސްޓްރަކްޓަރުގެ މައްޗަށް ކުށް ސާބިތުވެއްޖެ ނަމަ ފަސް އަހަރަށް ޖަލަށްލާނެއެވެ. ނުވަތަ 10،000 ރިންގިޓާއި ހަމައަށް ޖޫރިމަނާ ކުރާނެއެވެ.
މި ހާދިސާއާ ގުޅިގެން ސޯޝަލް މީޑިއާގައި ގިނަ ބަޔަކު ވަނީ އިންސްޓްރަކްޓަރަށް ހަރުކަށި އަދަބު ދިނުމަށް ގޮވާލާފައެވެ.
މެލޭޝިއާ ސަރުކާރުން ވެސް ވަނީ މި ހާދިސާ ކުށްވެރިކޮށް، އެގައުމުގެ ފަތުރުވެރިންގެ ސަލާމަތަށް ފިޔަވަޅު އަޅާނެ ކަމަށް ވައުދުވެފަ އެވެ.
