މިދިޔަ އަހަރުގެ އޯލެވެލް އެންމެ ރަނގަޅު ނަތީޖާ ހޯދި ދަރިވަރުންނަށް އިނާމް ދިނުމަށް މިރޭ ދަރުބާރުގޭގައި ކުރިއަށްދާ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އެ އަމާޒަށް ވާސިލްވުމަށް ލިބޭ އެންމެ ބޮޑު ހިތްވަރަކީ ދަރިވަރުން ހޯދި ފުރިހަމަ ނަތީޖާ ކަމަށެވެ.
މިފަހަރު އިނާމް ލިބޭ ދަތިވަރުނާއި އެންމެހައި ދިވެހި ދަރިވަރުންނަށް ކުރައްވާ އިލްތިމާސްއަކީ ތައުލީމީ ރޮނގުން ކުރިއަށް ދިއުމަށް ފަހިވެފައިވާ ފުރުސަތުތަކުގެ ބޭނުން ވީއެންމެ ފުރިހަމައަކަށް ހިފުންކަމަށާއި ދިވެހި ގައުމާއި ދަރިވަރުންގެ އާއިލާތައްވެސް ފަހުރުވެރިވާނެ ފަދަ، އިލްމީ އަދި ހެޔޮލަފާ ކުދިންތަކަކަށްވުމަށް ކަމަށް ރައީސް ވިދާޅުވިއެވެ.
ރައީސް ވިދާޅުވީ މިދިޔަ ފަސް އަހަރުގެ ތެރޭގައި، ރާއްޖޭގެ އެކި ރަށްރަށުގެ ސްކޫލް މަދަރުސާތަކުގެ ވަސީލަތްތައް ފުރިހަމަކުރުމަށް ގިނަ މަޝްރޫޢުތަކެއް ހިންގިއްޖެ ކަމަށާއި އެތައް ރަށެއްގައި އިތުރު ކްލާސްރޫމްތަކާއި، މަލްޓިޕަރޕަސް ހޯލްތައް އިމާރާތް ކުރެވިއްޖެ ކަމަށެވެ.
އަދި ކޮމްޕިއުޓަރު ލެބްތަކާއި، ސައެންސް ލެބްތައްވެސް ގާއިމު ކުރެވިއްޖެކަމަށާއި މިހާރުވެސް މިފަދަ އެތައް މަޝްރޫޢެއްގެ މަސައްކަތް ކުރިއަށް ދާކަމަށް ރައީސް ވިދާޅުވިއެވެ.
ސްކޫލްތަކުގެ ކިޔެވުން ހަރުދަނާކުރުމަށް ރާއްޖޭގެ ސްކޫލްތަކުގެ ރިވިއު އެނަލިސިސްއެއް ހަދާ އެންމެ ބޮޑު އެހީތެރިކަމެއް ބޭނުންވާ ސްކޫލްތައް ފާހަގަ ކުރެވިފައިވާކަމަށާއި އަދި އެ ސްކޫލްތަކުގެ ހާލަތު ރަނގަޅު ކުރުމަށް ޕްރޮގްރާމްތައް ހިންގަމުން ގެންދާކަމަށްވެސް ރައީސް ވިދާޅުވިއެވެ.
ނަމަވެސް ރަށުގެ އާބާދީ ކުޑަވުމަކީ އެ ރަށެއްގެ ރައްޔިތުން އަދި ހާއްސަކޮށް ދަރިވަރުން، އެފަދަ ނުރައްކާތެރި ތަކުލީފުތަކެއް އުފުލަންޖެހޭނެ ސަބަބެއް ނޫން ކަމަށާއި އެހެންކަމުން އެފަދަ ރަށްރަށުގެ ސްކޫލްތަކުގައި، ސެޓަލައިޓް ކްލާސްރޫމްތައް ގާއިމުކޮށްއެކަން މިހާރު ވަނީ ހައްލުކުރެވިފައި ވާކަމަށް ރައީސް ވިދާޅުވިއެވެ.
މިދިޔަ ދިރާސީ އަހަރު ސާނަވީ އިމްތިހާން ފުރިހަމަކުރި 6360 ދަރިވަރުންގެ ތެރެއިން، ގައުމީ ފެންވަރުގައި އެންމެ ގަދަ 10 ގައި ހިމެނުނު ދަރިވަރުނާއި ކޭމްބްރިޖް އިމްތިޙާނުން މުޅި ދުނިޔޭގެ އެންމެ ގަދަ 10 ވަނައިގައި ހިމެނުނު 11 ދަރިވަރަކާއި، ކޭމްބްރިޖްގެ ހައި އެޗީވްމެންޓް ހާސިލުކުރާ 6 ދަރިވަރަކު ވެސް މި ފަހަރުގެ އިނާމް ލިބިގެންދާނެ އެވެ.
