މިދިޔަ އަހަރުގެ އޯލެވެލް އެންމެ ރަނގަޅު ނަތީޖާ ހޯދި ދަރިވަރުންނަށް އިނާމް ދިނުމަށް މިރޭ ދަރުބާރުގޭގައި ކުރިއަށްދާ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ކޮންމެ ދަރިވަރަކުވެސް މަސައްކަތް ކުރަންވީ އިލްމީ ގާބިލުކަން ހޯދަންކަމަށާއި ތއުލީމުން އެމީހެއްގެ ސިކުނޑި މުއްސަނދިވާ ވަރަކަށް، އެމީހެއްގެ ފަރާތުން ގައުމަށް ކުރާ މަންފާ އިތުރުވާނެ ކަމަށެވެ.
ރައީސް ވިދާޅުވީ ގައުމީ ތަރައްގީއަކީ، ގައުމުގެ ފަރުދުންގެ އަމިއްލަ ޒާތަށް އަންނަ އިލްމީ ހޭލުންތެރިކަމާއި ތަހުޒީބީ ކުރިއެރުމުގެ ޒަރީއާއިން ގައުމަށް ގެނެވޭ ބަދަލުތަކެއްކަމަށާއި މިވަގުތު ގައުމު އޮތް ހާލަތަށް ވިސްނައި، މާދަމާ ގައުމު އޮންނަން ބޭނުންވާ ގޮތް، ސިކުނޑިއަށް ތަސައްވަރުކޮށްދެނީ، އެމީހެއްގެ ކިބައިގައި ހުންނަ އިލްމީ ގާބިލުކަމަކުން ކަމަށް ރައީސް ވިދާޅުވިއެވެ.
ތަރައްގީގެ މަންޒިލަށް ގައުމު ގެންގޮސްދޭނެ ހެޔޮލަފާ ރަނގަޅު ޖީލެއް ބިނާކުރެވޭނީ، ޒަމާނީ ތައުލީމާއި ތަރުބަވީ އަހްލާގުގެ މާހައުލަކަށް ސްކޫލްތައް ހަދައިގެން ކަމަށާއި ސްކޫލްތަކުގައި އެފަދަ މާހައުލެއް ގާއިމުވާނީ، އެތަނެއް ހިންގަން ތިބޭ ވެރިންނާއި، ދަރިވަރުންނަށް ކިޔަވައިދީ ތަރުބިއްޔަތުކުރަން ތިބޭ ޓީޗަރުންގެ ކިބައިގައި އިލްމީ ގާބިލުކަން ހުރެގެންކަމަށް ރައީސް ވިދާޅުވިއެވެ.
އެހެންކަމުން ސްކޫލްތަކުގެ ޓީޗަރުންނާއި ޕްރިންސިޕަލުން ތަމްރީނު ކުރުމުގެ ޕްރޮގްރާމްތައް ރާއްޖެއާއި ރާއްޖޭން ބޭރުގައި ސަރުކާރުން ކުރިއަށް ގެންދާކަމަށާއި ސްކޫލްތަކުގައި މަސައްކަތް ކުރާނެ ހެލްތުއޮފިސަރުންނާއި، ކައުންސެލަރުން ހަމަކުރުމުގެ މަސައްކަތްތައްވެސްކުރިއަށް ދާކަމަށް ރައީސް ވިދާޅުވިއެވެ.
މިދިޔަ އަހަރު ސާނަވީ އިމްތިހާން ފުރިހަމަކުރި 6360 ދަރިވަރުންގެ ތެރެއިން، ގައުމީ ފެންވަރުގައި އެންމެ ގަދަ 10ގައި 400 އަށް ވުރެ ގިނަ ދަރުވަރުން ހިމެނުނު އިރު، ކޭމްބްރިޖް އިމްތިހާނުން މުޅި ދުނިޔޭގެ އެންމެ ގަދަ 10 ވަނައިގައި 11 ދަރިވަރަކާއި، ކޭމްބްރިޖްގެ ހައި އެޗީވްމެންޓް 6 ދަރިވަރަކު ހާސިލްކުރި އެވެ.
