މިދިޔަ އަހަރު އޯލެވެލްގެ ގަދަ 10 ގައި ހިމެނުނު ދަރިވަރުންނާއި ދުނިޔޭގެ ފެންވަރުގައި ރަނގަޅު ނަތީޖާ ހޯދި ދަރިވަރުންނަށް އިނާމް ދިނުމުގެ ހަފްލާތައް ދަރުބާރުގޭގައި މިހާރު ކުރިއަށްދާއިރު އޯލެވެލްގައި 16 ދަރިވަރަކު ދުނިޔޭގެ ފެންވަރުގައި ރަނގަޅު ނަތީޖާ ހޯދިކަމަށް އެޑިއުކޭޝަން މިނިސްޓްރީން ބުނެއެވެ.
ދުނިޔޭގެ ފެންވަރުގައި ރަނގަޅު ނަތީޖާ ހޯދި ދިވެހި ދަރިވަރުންގެ ތެރޭގައި ހިމެނެނީ 11 އަންހެން ކުދިންނާއި ފަސް ފިހެެން ދަރިވަރުންނެވެ.
އޭގެތެރެއިން ނުވަ ދަރިވަރަކު އެކި މާއްދާތަކުން ދުނިޔެއިން އެއް ވަނަ އަށް ގޮސްފައިވާ ކަމަށް ވެސް މިނިސްޓްރީން ބުންޏެވެ.
ޖުމްލަ 6،300 ދަރިވަރަކު މިދިޔަ އަހަރު އޯލެވެލް އިމްތިހާނު ހެދިއިރު ގަދަ 10 ގައި އޭގެ ތެރެއިން ތެރެއިން 844 ހިމެނުނު ކަމަށްވެސް އެޑިއުކޭޝަން މިނިސްޓްރީން ބުނެއެވެ.
މިދިޔަ އަހަރު ގަދަ 10 ގައި ހިމެނުނު ބައެއް ދަރިވަރުންނާއެކު ރައީސް އަދި އެޑިއުކޭޝަން މިނިސްޓަރު
މިދިޔަ އަހަރު ރާއްޖެއިން އޯލެވެލް ހެދި ދަރިވަރުންގެ ތެރެއިން އިހުތިޔާރީ މާއްދާތަކުން 60 ޕަސެންޓަށް ވުރެ ގިނަ ކުދިން ފާސްވިއިރު ބިޒްނަސް ސްޓްރީމް މާއްދާތަކުން ފުރަތަ ފަހަރަށް 75 ޕަސެންޓަށް ވުރެ ގިނަ ކުދިން ފާސްވިކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.
އަދި އާޓްސް އާއި ސައިންސް ސްޓްރީމް 80 ޕަސެންޓަށް ވުރެ ގިނަ ކުދިން ފާސްވިއިރު އިނގިރޭސި މާއްދާއިން ފާސްވި ކުދިންގެ އަދަދު 73 ޕަސެންޓް އިތުރުކަމަށްވެސް އެޑިއުކޭޝަން މިނިސްޓްރީން ބުނެއެވެ.
