ރައްޔިތުންގެ މަޖިލީހުގެ މިއަދުގެ ޖަލްސާގައި ރައީސް ނަޝީދު ވަނީ މަޝްހޫރު ލަވަކިއުންތެރިޔާ ނައިފަރު ދޮހޮއްކޮގެ "ދިޔަވަތް ރަނގަޅު އޮޑި" މި ލަވައިގެ ބައިތެއް ވިދާޅުވެ ސިޔާސީ މަޝްރަހު ކުރިއަށް އޮތް ތާންގައި ހަލަބޮލި ވާނެކަމުގެ އިޝާރާތް ކުރައްވާފައެވެ.
ޖޫންޖުލައިގެ ވިއްސާރައަށް މިސާލު ޖައްސަވާ ސިޔާސީ މަޝްރަހުގެ ވާހަކަ ރައީސް ނަޝީދު ވިދާޅުވިއިރު އެމްޑީޕީގެ ޕްރައިމަރީއަށްފަހު އުފެދުނު ނުތަނަވަސްކަމުގައި "ފިކުރެއްގެ ދިރުން" ގެ ނަމުގައި އެމްޑީޕީއާ ދެކޮޅާށް މަސައްކަތް ކުރަމުން ގެންދެވި ރައީސް ނަޝީދުގެ އަރިސް ބޭފުޅުން މިހަރުވަނީ "ދަ ޑިމޮކްރެޓްސް" ގެ ނަމުގައި އާ ސިޔާސީ ޕާޓީއެއް އުފެއްދުމުގެ މަސައްކަތް ފައްޓަވާފައެވެ.
އެއީ ރައީސް ނަޝީދު އިސްކޮށް ހުންނަވާ އުފައްދާ ޕާޓީއެއްކަމަށް އެބޭފުޅުން ވިދާޅުވެއެވެ. ނަމަވެސް ރައީސް ނަޝީދު އަދިވެސް ހުންނެވީ އެމްޑީޕީގެ ރައީސްގެ މަގާމުގައި އެޕާޓީ ގައެވެ.
