ކުރީގެ ރައީސް މައުމޫނު އަބްދުލްގައްޔޫމް އިސްކޮށް ހުންނަވާ އުފައްދާފައިވާ އެމްއާއުއެމް އުވާލުމަށް އިލެކްޝަންސް ކޮމިޝަނުން ނިންމީ މިއަދު އެވެ.
ގާނޫނުގައި ބުނާ 3،000 މެމްބަރުން ހަމަނުވެގެން ދެ ވަނަ ނޯޓިސްއެއް ދިނުމަށް ފަހު އެމްއާރުއެމް އުވާލަން އިލެކްޝަންސް ކޮމިޝަން (އީސީ)ން މިއަދު ވަނީ ނިންމާފައެވެ. އިލެކްޝަންސްއިން ހާމަކުރި މައުލޫމާތުގައިވާގޮތުން ފެބުރުއަރީއާ ހަމައަށް އެޕާޓީގެ މެމްބަރުންގެ އަދަދަކީ 2،981 އެވެ. މަދުވަނީ 21 މެންބަރުންނެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ފާރިޝް ވިދާޅުވީ އެޕާޓީން މެމްބަރުން ވަކިކުރަމުން ގެންދާގޮތް ބަލަން ޖެހޭކަމަށާއި އެކަމުގައި ކަން ހިނގާފައިވާ ގޮތް އީސީގެ ރައީސް ފުއާދު ގާސިމް ބެއްލެވުމަށް ވެސް އެދޭކަމަށެވެ.
އީސީގެ ތެރެއަށް ކޮންމެ ވެސް ބައެއްގެ ސިޔާސީ ނުފޫޒު ވަދެފައިވާކަން ގަބޫލު ކުރެއްވޭ މޭރުމަކުން ވާހަކަ ފައްދަވަމުން ފާރިޝް ވިދާޅުވީ އެޕާޓީއަށް މެމްބަރުން ވައްދާގޮތާއި ފޯމްތައް ހުށަހަޅާގޮތާއި އަދި ޕްރޮސެސް ކުރާގޮތުގެ އިތުރުން ޕާޓީން މެމްބަރުން ވަކިކުރަމުން ގެންދާ ގޮތް ބަލަން ބޭނުންވާ ކަމަށެވެ.
ފާރިޝް ވިދާޅުވީ ޕާޓީ އުވާލުން ހުއްޓުވުމުގެ އަމުރެއް ހޯދުމަށް އެއީ އޮތް ފުރުސަތެއްކަމަށްވެސް ބަލާކަމަށާއި ނަމަވެސް ފުރަތަމަ އޮޕްޝަނަކީ އީސީން މިމައްސަލަ އަލުން މުރާޖައާކޮށް ދިނުން ކަމަށެވެ.
ފާރިޝް ވިދާޅުވީ މިމައްސަލާގައި ދާން ޖެހޭ ކޯޓަކަށް ދިއުމަކީވެސް އޮތް އޮޕަޝަނެއް ކަމަށެވެ.
ފާރިޝް ވިދާޅުވީ އެމްއާރުއެމުން ކެނޑުމަށް އެދިފައިވާކަމަށް ބުނެ މިއަދު ކަނޑާލި ބައެއް މީހުނަކީވެސް ސިޓީގައި ވާގޮތުން 2017 ވަނަ އަހަރު އެޕާޓީން ކެނޑުމަށް ހުށަހެޅި ސިޓީ ކަމަށެވެ. ނަމަވެްސ 2017 ވަނަ އަހަރު އެމްއާރުއެމް ވުޖޫދުގައިވެސް ނެތްކަމަށް ފާރިޝް ވިދާޅުވިއެވެ.