ޔުނައިޓެޑް ސްޓޭޓްސް ފޯ އިންޓަނޭޝަނަލް ޑިވެލޮޕްމަންޓް (ޔޫއެސްއޭއައިޑީ) އާއި ދިވެހި ސަރުކާރާ އެކު ވެފައިވާ އެއްބަސްވުމަށް އިސްލާހު ގެނެސް، ކުރިއަށް އޮތް އަހަރަށް އިތުރު 7.2 މިލިއަން ޑޮލަރުގެ އެހީ ފޯރުކޮށްދިނުމަށް އެއްބަސްވުމުގައި ސޮއިކޮށްފިއެވެ.
މި ޑިވެލޮޕްމަންޓް އޮބްޖެކްޓިވް ގްރާންޓް އެގްރިމަންޓުގައި އެމެރިކާގެ ފަރާތުން ސޮއިކުރައްވާފައި ވަނީ ޝާޖޭ ޑި އެފެއާޒް ގެބްރިއަލް ގްރައުއެވެ. ދިވެހި ސަރުކާރުގެ ފަރާތުން ސޮއިކުރެއްވީ ފޮރިން މިނިސްޓްރީގެ ސްޓޭޓު މިނިސްޓަރު އަހުމަދު ހަލީލެވެ.
މި އެއްބަސްވުމުގެ ދަށުން އިތުރު 7.2 މިލިއަން ޑޮލަރުގެ އެހީ އެމެރިކާގެ ފަރާތުން ރާއްޖެއަށް ފޯރުކޮށްދޭނެއެވެ. މި އެހީ އާއެކު 2019 ގައި ފުރަތަމަ ސޮއިކުރި މި އެއްބަސްވުމުގެ ދަށުން ރާއްޖެއަށް ފޯރުކޮށްދީފައިވާ އެހީގެ އަދަދު 36 މިލިއަން ޑޮލަރަށް (554.4 މިލިއަން ރުފިޔާ) އަރާނެއެވެ. މި އެހީގެ ދަށުން އެހީތެރިކަން ފޯރުކޮށްދޭނެ ދާއިރާތަކަކީ ޑިމޮކްރެޓިކް ހިންގުންތެރިކަން، އަމިއްލަ ފަރުދުންނާއި މުޖުތަމައުގެ ވިލުންވެރިކަން އަދި ތިމާވެށި ހިމާޔަތް ކުރުމާއި މޫސުމަށް އަންނަ ބަދަލުތަކަށް ހޭނުމެވެ.
"މި އެއްބަސްވުމުގެ ދަށުން އެމެރިކާ އާއި ދިވެހި ރައްޔިތުންނާއި ދިވެހި ސަރުކާރާ އެކު ވާ ގުޅުން އިތުރަށް ފުޅާވެ، އެމެރިކާ އާއި ރާއްޖޭން އިސްކަންދޭ ކަންކަން ކުރިއެރުވުމަށް އެހީ ވެދޭނެ. އަދި މިއީ ހަމަ ޖެހޭ ފާގަތި މުސްތަގުބަލަކަށް ދިވެހީން ކުރާ މަސައްކަތަށް އަޅުގަނޑުމެން ދޭ އެއްބާރުލުމަށް ބާރުއަޅާ ކަމެއް،" ޝާޖޭ ގްރައު ވިދާޅުވިއެވެ.
