މިހާރު އަމަލުކުރަމުންދާ ގާނޫނު އަސާސީ ޑްރާފްޓްކުރި ކޮމިޓީގެ މުގައްރިރުކަންވެސް ކުރެއްވި އިބްރާ ވިދާޅުވީ 2020 ވަނައަހރުން ފެށިގެން މަޖިލީސްތެރޭގައި ނުތަނަވަސްކަން އުފެދިފައިވާ ކަމަށާއި އޭރުވެސް މަޖިލިސް ހިނގަމުން އައީ ގަވާއިދާ ހިލާފަށް ކަމަށެވެ.
އިބްރާ ވިދާޅުވީ އެކަން އެހެން އޮތް ނަމަވެސް އެއްވެސް މީހަކު ވެސް އަދި މަޖިލީހުގެ އެއްވެސް މެންބަރަކުވެސް މިއަދާ ހަމައަށް އައިއިރުވެސް އެކަންކަމާ އެއްޗެއް ނުބުނާ ކަމަށާއި، އަދި ކަން އެހެން އޮވެ، މިއަދާ ހަމައަށް އައިސް ރައީސް ނަޝީދާއި ރައީސް ސޯލިހާ ދެމެދު ހިޔާލުތަފާތިވެ، ޕާޓީ ބައިބައިވެ، ޕާޓީތެރެއިން އާ ޕާޓީއެއް އުފެދި ، ހިނގި އެއް ހާދިސާއަކާ ގުޅިގެން މަޖިލީސް ރައީސްގެ އިތުބާރު ނެތްކަމަށް ނިންމުމުން އެވާހަކަ ދެކޮޅު ނުޖެހޭ ކަމަށެވެ.
އިބްރާ ވިދާޅުވީ އިއްޔެ މަޖިލީހުގައި ކަން ހިނގާ ދިޔަގޮތުން ރައީސް ނަޝީދުގެ ދިފާއުގައި އެއްޗެއް ބުނަނީ ނޫން ކަމަށާއި، އިއްޔެ މަޖިލީސް ހިނގި ގޮތްވެސް ކަމުނުދާ ކަމަށެވެ. ފޯޅަވަހީގެ މައްސަލާގައި ބަންޑާރަ ނައިބު ޖަވާބުދާރީ ނުކުރެވޭނެ ކަމަށްވެސް އިބްރާ ވިދާޅުވިއެވެ.
އިބްރާ ވިދާޅުވީ ދެން ބަލަން ޖެހޭ ކަމަކީ އޭޖީގެ ވަކާލާތު ކުރުން ހުރީ ސަރުކާރުން ނެގި ޕޮޒިޝަނަށް ގެއްލުން ލިބޭ ގޮތަށް ހުރިތޯ ކަމަށެވެ.
އެހެންވެ، އިބްރާ ވިދާޅުވީ މި މައްސަލާގައި ގާނޫނާ ހިލާފަށް ދައުލަތުން ކަންކަން ކޮށްފައި ހުރި ކަމަށް ވާނަމަ އަދި އޭގެ ހެކިތައް ފެންނަން ހުރި ކަމަށްވާނަމަ މަޖިލީހަށް ހާޒިރު ކުރަން ޖެހޭނީ ރައީސުލް ޖުމްހޫރިއްޔާ ކަމަށެވެ.
އިބްރާ ވިދާޅުވީ މިހެން މިވާހަކަ ދެއްކާފައި ނިންމާލުމުން ރައީސް ނަޝީދާއި، އޭޖީ ރިފްއަތުވެސް ދިފާއު ކުރައްވަނީ ކަމަށް ބައެއްމީހުން ބުނެފާނެ ކަމަށާއި، އެކަން އޮތީ އެހެން ނޫން ކަމަށޭވެ.
އެމްޑީޕީގެ ފުރައްތަމަ ރައީސްކަންވެސް ކުރެއްވި އިބްރާ ގެންދަވަނީ ސޯޝަލް މީޑިއާގެ އެކި ޕްލެޓްފޯމްތަކުގައި ރާއްޖޭގެ ސިޔާސީ ކަންކަމާ ބެހޭ ގޮތުން ހިޔާލު ފާޅުކުރައްވަމުންނެވެ.
