ރައީސް މައުމޫނުގެ ދިގު 30 އަހަރުގެ ޒަމާންވީ ވެރިކަމުގެ ދުވަސްވަރު، ކޮންމެ ފަސްއަހަރެއްގެ ދައުރު ނިމޭ ހިސާބަށް ދިއުމުން ރަށްރަށަށް ވަޑައިގެން މަހުގެ އަގުން 25 ލާރި ބޮޑުކޮށްލައެވެ. ދެން ހުރިހާ މަސްވެރީންނާއި ރައްޔިތުން އަތްތިލަބަޑި ޖަހާ ސަނާ ކިޔަން ފަށައެވެ.
ދެން ފެށުނީ އެމްޑީޕީގެ ވެރިކަމެވެ. ވެރިކަމަށް އެމްޑީޕީ އައީ ގިނަ ވައުދުތަކެއް ވެގެންނެވެ. ތާހިރު ދިރިއުޅުމެއް ރައްޔިތުންނަށް ހޯދައި ދިނުމަށްޓަކައެވެ. އެކަނިވެރި މައިންގެ އެލަވަންސާއި، އުމުރުން ދުވަސްވީ މީހުގެ އިނާޔަތާއި، ބޭސް ސިޓީއަށް ސަލާން ޖެހުން ހުއްޓުވުމާއި، މިނޫންވެސް ވަރަށް ގިނަ ކަންކަން ކުރާނެ ކަމަށް ބުނަމުންނެވެ.
ރައީސް ނަޝީދު އެމްޑީޕީގެ ހަރަކާތެއްގައި
އެމްޑީޕީން އޭރުވީ ވައުދުތަކުގެ ތެރެއިން ބައެއްކަންކަން ރައީސް ނަޝީދުގެ ވެރިކަމުގެ ތިން އަހަރުގެ ވެރިކަމުގައި ކުރެއްވިއެވެ. އެވެރިކަން ނިމި އަދި ވެރިކަމުގެ ފަހުކޮޅުގައި، ރައީސް ނަޝީދު އިސްތިއުފާ ދެއްވުމާ ގުޅިގެން ވަޑައިގެންނެވި ރައީސް ޑރ މުހައްމަދު ވަހީދު ހަސަން މަނިކުގެ ވެރިކަންވެސް ނިމި ދެން އައީ އަނެއްކާވެސް އިންތިޚާބެކެވެ. އެކި ޕާޓީތަކުން ވައުދުތައް ވާންފެށިއެވެ.
އެމްޑީޕީގެ އެއްވުމެއް
ވައުދުތައް ވުމުގައި ޕާޓީތަކާއި ވެރިކަމަށް ކިުރިމަތިލާ ވަކިވަކި ކެންޑިޑޭޓުންގެވެސް މާބޮޑު ތަފާތެއް ނެތެވެ. ބޮޑެތި ވައުދުތައް ކޮންމެ ފަހަރަކުވެސް ވަމުންދެއެވެ.
ރައީސް ޔާމީނުގެ ސަރުކާރުގައި މަސްވެރިއަކަށް ދޭންބުނި 10000ރުފިޔާއާއި، ދަނޑުވެރިއަކަށް ދޭން ބުނި 8000 ރުފިޔާގެ ވާހަކައަކީ ދިވެހީން ހަނދާން ހުންނަ ދޮގުތަކެވެ. މި ނޫނަސް މިކަހަލަ ކިތަންމެ ވައުދުތަކެއް ވެފައި ވެއެވެ. މިހާރު މިއޮތް އެމްޑީޕީގެ ސަރުކާރުގައި އަލަށް އުފަންވާ ކޮންމެ ކުއްޖަކަށް ދޭންބުނި ހަދިޔާ ފޮއްޓާއި އެމްއެމް ޕީއާރު ސީގެ މައްސަލައާއި، ގޮތްނޭނގޭ މަރުތަކުގެ ވާހަކަތައްވެސް ވީ ބިލާހަކަށެވެ.
ރައީސް ޔާމީން ޖަލްސާއެއްގައި ވާހަކަފުޅު ދައްކަވަނީ: ފޮޓޯ ޕީޕީއެމް
އެހެންކަމުން ވައުދުތައް އެއީ ވެރިކަމަށް އައުމަށްޓަކައި ބޭނުން ކުރަ "ދޫފުރޮޅި" ތަކެކެވެ. ނުވާނެކަން އެނގި ތިބެ ދައްކާ "ހޮޅި" ވާހަކަ ތަކެކެވެ.
ކުރިއަށް އޮތީ އިންތިޚާބެކެވެ. އަނެއްކާވެސް އެފަދަ ވައުދުތައް ވާން ފަށައިފިއެވެ. މިފަހަރު އާ ކެނޑިޑޭޓުންވެސް ހިމެނެއެވެ. ބޮޑެތި ޕާޓީތައް އަދި ކެމްޕޭނަށް ހަމަޔަކަށް ނޭޅޭތީ ވައުދެއް ނާދެއެވެ. އެކަމަކު އެމްއެންޕީއާއި، އުމަރު ނަސީރު ފަދަ ބޭފުޅުންގެ ވައުދުތައް އަޑު އިވެން ފަށައިފިއެވެ.
އެގޮތުން އެމްއެންޕީގެ މެނިފެސްޓޯގައި ޕްރީ ސްކޫލު މަރުހަލާއިން ފެށިގެން ޕީއެޗްޑީއަށް ހިލޭ ކިޔަވައި ދިނުމާއި ޑޮމެސްޓިކް ފެން ބިލުން 3،000 މީޓަރުގެ ފެން ހިލޭ ކޮށްދިނުމާއި، ޑޮމެސްޓިކް ކަރަންޓު މީޓަރުތަކުން ކޮންމެ މަހަކު ފުރަތަމަ 100 ޔުނިޓް ހިލޭ ކޮށްދިނުން ހިމެނޭއިރު އަލަށް އުފަންވާ ކޮންމެ ކުއްޖަކަށް 5،000 ރުފިޔާގެ އިނާޔަތެއް ދިނުމަށްވެސް ނާޒިމްގެ މެނިފެސްޓޯގައި ހިމަނާފައި ވެއެވެ.
އެމްއެންޕީގެ ރައީސް އަދި ރިޔާސީ ކެންޑިޑޭޓް މުހައްމަދު ނާޒިމް
މީގެ އިތުރުން ހުޅުމާލޭ ހިޔާ ފްލެޓްތަކުގެ ކުލި 4000 ރުފިޔާއަށް ކުޑަކޮށއ ޕެޑް ހިލޭ ކޮށްދިނުމާއި، އެކަނިވެރި މައިންނަށް ދޭ އިނާޔަތް 4000 ރުފިޔާއަށް ބޮޑުކުރުންވެސް ނާޒިމްގެ މެނިފެސްޓޯގައި ވަނީ ހިމަނާފައެވެ.
3،000 ރުފިޔާގެ ރޯދަ އެލަވަންސެއް 18 އަހަރުން މަތީގެ އެންމެނަށް ދިނުމާއި 18 އަހަރުން މަތީގެ މީހުންގެ ތެރެއިން ބޯހިޔާވަހިކަމުގެ ޝަރުތު ހަމަވާ މީހުންގެ ދަފްތަރެއް އެކުލަވާލުންވެސް ނާޒިމްގެ މެނިފެސްޓޯގައި ވެއެވެ.
އަންނަން ހުރި މެނިފެސްޓޯތަކާއި ވައުދުތައް މާގިނައެވެ. އެކަމަކު މިހާރުވެސް ދިވެހީން ކުރާ ޝަކުވާތައް އަޑުއަހާ ބަޔަކު ތިބިއްޔާ އަޑު އިވޭނެއެވެ. ބޭސްފަރުވާއާއި ތައުލީމާއި، ހިދްމަތް ލިބުމުގައި ހުރި ދަތިތަކާއި ދުވަހުން ދުވަހަށް ތަކެތީގެ އަގުބޮޑުވުމާއި މިފަދަ އެތައް ޝަކުވާއެކެވެ. އެކަމަކު "ދޫފުރޮޅި" ތަކެއްފަދަ ވައުދުތައް މިފަހަރުވެސް އިވޭނެއެވެ.
