އާބަންކޯއިން ބުނީ ކޮންމެ އަހަރަކުވެސް ޖޫން ޖުލައި މަހަކީ ވިއްސާރަ ދުވަސްވަރަކަށްވާއިރު، މި ދުވަސްވަރު އެކި ސަރަހައްދުތަކުގައި މަދިރި އާލާވެ، އެތަކެތީގެ ސަބަބުން ޑެންގޫ ބަލި ފެތުރޭ މިންވަރު އިތުރުވެފައިވާކަން އެ ކޯޕަރޭޝަނަށް ފާހަގަވެފައިވާ ކަމަށެވެ. އެކަން ކޮންޓްރޯލްކޮށް، ހުޅުމާލޭގައި ދިރިއުޅޭ ރައްޔިތުންގެ ރައްކާތެރިކަން ކަށަވަރުކުރުމަށް އެ ކޯޕަރޭޝަނުން ކުރާ މަސައްކަތެއްގެ ގޮތުން މިހާރު ވަނީ މުޅި ހުޅުމާލޭގައި މަދިރި އާލާވުން ނައްތާލުމަށް ފޮގް ކުރަން ފަށާފައި ކަމަށް އާބަންކޯއިން ބުނެއެވެ.
އާބަންކޯއިން ބުނެފައިވަނީ ކޮންމެ ދުވަހެއްގެ ފަތިހާއި ހަވީރު ހުޅުމާލެ ތެރެއަށް ފޮގްކުރާއިރު، އެކަމުގައި އިސްކަންދެނީ މީހުން ދިރިއުޅޭ ސަރަހައްދުތަކާއި މަދިރި އާލާވުން އެކަށީގެންވާ ފަދަ ސަރަހައްދުތަކަށް ކަމަށެވެ.
މަދިރި އާލާވެ، ޑެންގޫ ހުން ފެތުރެމުންދާ މިންވަރު އިތުރުވެފައިވާތީ އާބަންކޯއިން ހުޅުމާލޭގައި ފޮގް ކުރަނީ - ފޮޓޯ:އާބަންކޯ
އާބަންކޯއިން ބުނި ގޮތުގައި އެ ކޯޕަރޭޝަނުގެ ފަރާތުން މަދިރި އާލާވުން ހުއްޓުވައި ބަލިތަކުން ރައްކާތެރިވުމަށް މަސައްކަތް ކުރަމުން އަންނައިރު، އެކަމުގައި އެންމެހާ ފަރާތްތަކުގެ އެއްބާރުލުމަކީ މުހިންމު ކަމެއް ކަމުގައެވެ. އެގޮތުން ދިރިއުޅޭ ގެއާއި ގޯތި ތެރޭގައި މަދިރި އާލާވާ ފަދަ ތަންތަން ހުރި ނަމަ އެފަދަ ތަންތަން ނައްތާލުމާއި ސާފުތާހިރުކޮށް ބެލެހެއްޓުމަކީ މުހިންމު ކަމެއް ކަމަށް އެ ކޯޕަރޭޝަނުން ބުނެއެވެ.
